Saılaý aldyndaǵy úgit-nasıhat kezinde 4 quqyqbuzýshylyq anyqtalǵan – Bas prokýratýra

ASTANA. QazAqparat – QR Bas prokýratýrasy saılaý aldyndaǵy úgit-nasıhat kezinde anyqtalǵan buzýshylyqtar týraly baıandady, dep habarlaıdy QazAqparat tilshisi.

«Ýákiletti organdar boıynsha, prokýratýra barlyq normalardyń saqtalýyn baqylaıdy. Biz «Saılaý týraly» zańnyń buzylýyna jol bermegenimizdi atap ótkim keledi. Biraq 4 buzýshylyqty tirkedik: úgit-nasıhat kezinde eki fakt jáne ınternet-resýrstarda eki buzýshylyq anyqtaldy», - dedi QR Bas prokýrorynyń orynbasary Jandos Ómiralıev Ortalyq saılaý komıssııasynyń otyrysynda.

Óz sózinde Bas prokýratýra ókili zań buzǵandardyń barlyǵy kinásin tolyq moıyndaǵanyn jáne olarǵa aıyppul salynǵanyn aıtty.

Soynmen birge, Bas prokýratýra basqarmasynyń basshysy Azamat Serǵazın tórt buzýshylyq jóninde túsindirme berdi.

«Prezıdenttikke úmitkerlerdiń úgit materıaldaryna qasaqana zııan keltirý boıynsha eki fakt anyqtaldy. Munda kináliler ÁQBtK-niń 114-baby boıynsha jaýapqa tartyldy. Taǵy eki fakt – OSK-ǵa habarlamaı, áleýmettik jelilerde saýalnama júrgizý jóninde», - dedi A. Serǵazın.

Buǵan deıin QR Ortalyq saılaý komıssııasynyń tóraǵasy Nurlan Ábdirov saılaý aldyndaǵy tynyshtyq qarsańynda úndeý jasaǵan edi.