SAILAÝ ALDYNDAǴY ÝÁDESІN ORYNDAMAǴAN DEPÝTATTY KERІ QAITARÝ MÚMKІN BOLADY - PREZIDENT

NUR-SULTAN. QazAqparat – Saılaý aldyndaǵy ýádesin oryndamaǵan depýtatty keri qaıtarýǵa múmkin bolady. Bul týraly Memleket basshysy Qasym-Jomart Toqaev Qazaqstan halqyna Joldaýy barysynda málim etti, dep habarlaıdy QazAqparat tilshisi.

Aıta keteıik, búgingi Joldaýda Prezıdent saılaýdyń proportsıonaldy-majorıtarlyq modeli týra málimdeme jasaǵan bolatyn.

«Imperatıvti mandatqa kóshýde depýtattardyń saılaýshylarmen ózara baılanysyn nyǵaıta túsedi. Bir sózben aıtqanda, endi saılaý aldynda bergen ýádesin oryndamaǵan depýtatty keri qaıtarýǵa bolady. Bul halyq qalaýlylaryna yqpal etýdiń taǵy bir joly. Osy ustanym demokratııa dástúrlerin edáýir nyǵaıtady. Ózara jaýapkershilik pen senimge negizdelgen jańa saıası mádenıetti qalyptastyrady. Proportsıonaldy jáne majorıtarly júıe qatar qoldanylsa, saıası partııalardyń róli saqtalady. Olar elimizdegi azamattyq qoǵamnyń basty ınstıtýttarynyń biri retinde qala beredi. Sonymen birge bul júıe saılaýdy ádil ótkizýge jáne memleketti tıimdi basqarýǵa múmkindik beredi», - dedi Memleket basshysy.

Osy oraıda Prezıdent aralas saılaý úlgisi azamattardyń saıası belsendiligin arttyryp, elimizdi jańǵyrtý úderisine jumyldyra túsetinine senim bildirdi.