Saılaý aldyndaǵy úgit: qarajatty ıgerý tártibin buzǵandarǵa jaýapkershilik kúsheıtiledi
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine caılaýdy jetildirý máseleleri boıynsha ózgerister men tolyqtyrýlar engizý týraly» zań jobasy men «QR Ákimshilik quqyq buzýshylyq týraly kodeksine ózgerister men tolyqtyrýlar engizý týraly» ilespe zań jobasy birinshi oqylymda maquldandy.
Atap aıtqanda, jaqynda «Qazaqstan Respýblıkasyndaǵy saılaý týraly» Konstıtýtsııalyq zańǵa ózgerister men tolyqtyrýlar engizý týraly» Konstıtýtsııalyq zań jobasy Parlament palatalarynyń birlesken otyrysynda qaralyp, birinshi oqylymda maquldandy.
Ondaǵy negizgi túzetýler:
- saılaý rásimderiniń ashyqtyǵyn arttyrýdy, saılaý qorlarynan tys qarjylandyrýǵa tyıym salýdy;
- ákimdikke kandıdattardyń daýystary teń bolǵan kezde qaıta daýys berý tártibin belgileýdi;
- bir adamnyń bir mezgilde máslıhat depýtattyǵyna jáne ákimge kandıdat bolýǵa tyıym salýdy;
- saılaý komıssııalary múshelerine qoıylatyn talaptar men jaýapkershilikti kúsheıtýdi, senim bildirilgen adamdardyń mártebesin naqtylaýdy;
- saılaý komıssııalary músheleriniń ókilettikterin ýaqytsha toqtatý máselesin retteýdi;
- jańadan qurylǵan nemese qaıta uıymdastyrylǵan ákimshilik-aýmaqtyq birlikterdegi saılaý komıssııalary músheleriniń ókilettik merzimin aıqyndaýdy kózdeıdi.
- Atalǵan Konstıtýtsııalyq zań jobasynyń normalaryn iske asyrýdy qamtamasyz etý maqsatynda ázirlengen ilespe zań jobalary boıynsha toqtalsam. Birinshiden, onlaın-platformalardy paıdalanýdy jáne barlyq kandıdat úshin teń jaǵdaılardy qamtamasyz etýdi retteıtin normalar engizildi.
– «Ákimshilik quqyq buzýshylyq týraly» Kodekste onlaın-platformalarda úgit materıaldaryn ornalastyrýdan bas tartqany jáne kandıdattar úshin teń emes jaǵdaılar jasaǵany úshin jeke tulǵalarǵa 20, zańdy tulǵalarǵa 50 aılyq eseptik kórsetkish kóleminde ákimshilik jaýapkershilik belgilendi. Ekinshiden, kandıdattar men saıası partııalardyń saılaý qorlarynan basqa, ózge de materıaldyq kómekti qabyldaýǵa tyıym salyndy. Saılaý qorlarynan tys qarjylyq jáne ózge de materıaldyq kómek alǵany úshin jeke tulǵalarǵa 25, al zańdy tulǵalarǵa 55 aılyq eseptik kórsetkish mólsherinde ákimshilik jaýapkershilik engizildi. Budan basqa, qoldanystaǵy Konstıtýtsııalyq zańda qarjylandyrý erejelerin buzǵan jaǵdaıda, kandıdatty nemese partııalyq tizimdi tirkeý jónindegi sheshimniń kúshin joıý týraly konstıtýtsııalyq jaýapkershilik kózdelgenin de atap ótý qajet. Bul saılaý naýqandaryn jasyryn jáne baqylaýsyz qarjylandyrýǵa jol bermeýge baǵyttalǵan, - dedi QR Premer-Mınıstriniń orynbasary – Ulttyq ekonomıka mınıstri Serik Jumanǵarın.
Sonymen qatar ol kandıdattyń saılaý aldyndaǵy úgit júrgizýge bólingen memlekettik bıýdjet qarajatyn jumsaý tártibin buzǵany úshin jaýapkershilik kúsheıtiletinin aıtty.
- Mundaı zań buzý derekteri úshin ákimshilik aıyppul mólsheri 5-ten 25 aılyq eseptik kórsetkishke deıin ulǵaıtyldy. Bul bıýdjet qarajatyn nysanaly jáne ashyq paıdalanýǵa yqpal etedi. Budan basqa, ilespe zańdarda máslıhattyń quzyretin «Qazaqstan Respýblıkasyndaǵy saılaý týraly» Konstıtýtsııalyq zańnyń normalarymen sáıkestendirýdi kózdeıtin redaktsııalyq túzetýler engizildi. Jalpy, usynylǵan sharalar adal básekelestikti qamtamasyz etýge, saılaý protsesiniń barlyq qatysýshysy úshin túsinikti jáne biryńǵaı erejeler belgileýge arnalǵan, - dedi Úkimet basshysynyń orynbasary.
