Jalǵan aqparatqa qarsy is-qımyl ortalyǵy saılaý aldynda el halqyna úndeý jasady
ASTANA. KAZINFORM — Jalǵan aqparatqa qarsy is-qımyl ortalyǵy qazaqstandyqtardy «Tynyshtyq kúni» jáne daýys berý kúni aqparattyq keńistikte taralýy múmkin arandatýshylyq ári manıpýlıatsııalyq materıaldardan saq bolýǵa úndedi.
Ortalyqtyń málimetinshe, saılaý kúnderi mundaı aqparattyq arandatýlar álemniń kóptegen elderinde tirkeledi. Olardyń negizgi maqsaty — daýys berý rásimi týraly burmalanǵan túsinik qalyptastyryp, azamattardyń jaǵymsyz emotsııalyq reaktsııasyn týyndatý.
Jalǵan jarııalanymdarda kóbine buryn túsirilgen fotolar men beınematerıaldar, basqa elderdegi oqıǵalarǵa qatysty kadrlar, túsirilgen ýaqyty men orny kórsetilmegen vıdeo úzindileri jáne anonımdi akkaýnttardan taraǵan aqparattar paıdalanylýy múmkin.
Sonymen qatar zamanaýı montaj jáne jasandy ıntellekt quraldary arqyly tanymal tulǵalar men saıasatkerlerdiń bet-beınesi nemese daýysy qoldanylǵan jalǵan foto, aýdıo jáne beınematerıaldar jasalatyny aıtyldy.
Ortalyq qazaqstandyqtardy aqparatty tek resmı derekkózderden alýǵa jáne kez kelgen málimettiń bastapqy derekkózin tekserýge shaqyrdy.
— Rastalmaǵan habarlamalardy taratpańyzdar. Aqparatqa muqııat ári jaýapkershilikpen qaraý saılaý kúni sabyrly ári ózara qurmetke negizdelgen ahýaldy saqtaýǵa yqpal etedi, — delingen úndeýde.
Aıta keteıik, búgin, 22 tamyz - Qazaqstanda Quryltaı saılaýy aldyndaǵy tynyshtyq kúni.
