Saılaý aldynda saýalnama júrgizetin uıymdar qatary tolyqty
ASTANA. KAZINFORM — Elimizde saılaýǵa qatysty saýalnama júrgizetin uıymdardyń jańa tizimi jarııalandy, dep habarlaıdy Ortalyq saılaý komıssııasynyń baspasóz qyzmeti.
2026 jylǵy 22 shildedegi jaǵdaı boıynsha Qazaqstan Respýblıkasynyń Ortalyq saılaý komıssııasyna 6 (alty) zańdy tulǵalardan tıisti qujattardyń kóshirmeleri qosa berilip, qoǵamdyq pikirge saýal salýdy júrgizý týraly habarlamalar kelip tústi, atap aıtqanda:
- «Eýrazııalyq ıntegratsııa ınstıtýty» JShS — saýal salý ádisi: daýys berý kúni saılaý ýchaskelerinen shyqqan saılaýshylar arasynda qoǵamdyq pikirge saýal salýdy júrgizý (exit-poll), sondaı-aq ózge de sotsıologııalyq zertteý túrleri (fokýs toptyq pikir alysýlar, saraptamalyq saýal salý, ınternet-resýrstar, face-to-face arqyly jappaı saýal salýdy júrgizý, ekspress-saýal salý) qoldanylady.
- «DATAMETRICS» JShS — saýal salý ádisi: «face to face» jeke suhbat ádisimen;
- «Qoǵamdyq saıasat ınstıtýty» jeke menshik mekemesi» — saýal salý ádisi: «face to face» suhbaty, telefon arqyly saýal salý, ınternet-saýal salý, exit-poll;
- «Keshendi áleýmettik zertteýler ınstıtýty – Astana» jeke qory IKSI «SOTsIS-A» — saýal salý ádisi: daýys berý úı-jaılary men ýchaskelerinen tys jerlerde «jeke saýalnama» jáne «úzdiksiz aǵyn» ádisterimen (exit-poll) saýal salý, «face-to face» jeke suhbat, áleýmettik jeliler men elektrondyq taratý quraldaryn paıdalana otyryp qashyqtyqtan saýalnama júrgizý;
- «Qazaqstandyq qoǵamdyq damý ınstıtýty» KEAQ — saýal salý ádisi: «face-to-face» jeke suhbat ádisimen, telefon arqyly saýal salý, exit-poll, ınternet-saýal salýdy, ınternet-arnalardy paıdalaný arqyly jappaı saýal salýdy júrgizý;
- «Demokratııa Instıtýty» ǵylymı-zertteý assotsıatsııasy» QB — saýal salý ádisi: «face-to-face» suhbaty, ınternet-arnalardy paıdalaný arqyly jappaı saýal salýdy júrgizý ádisimen.
Zańǵa sáıkes, buqaralyq aqparat quraldary men onlaın-platformalar saýalnama nátıjelerin jarııalaǵan kezde zertteý júrgizgen uıymdy, tapsyrys berýshini, saýalnama ýaqytyn, aqparat jınaý ádisin, suraqtyń naqty tujyrymyn, qatysýshylar sanyn jáne qatelik koeffıtsıentin kórsetýge mindetti.
Sonymen qatar saılaý aldyndaǵy sońǵy bes kúnde jáne daýys berý kúni qoǵamdyq pikir saýaldarynyń nátıjelerin, saılaý qorytyndysyna qatysty boljamdardy jarııalaýǵa tyıym salynady.
Saılaý kúni daýys berý oryndarynda qoǵamdyq pikirge saýalnama júrgizýge de ruqsat etilmeıdi. Bul talaptardy buzý ákimshilik jaýapkershilikke ákelýi múmkin.
Osyǵan deıin OSK saılaý aldynda saýalnama júrgizetin 5 uıymdy ataǵan edi.
