«Saılaý ádil ótti»: Respublica partııasy exit poll nátıjelerine qatysty pikir bildirdi
ASTANA. KAZINFORM — Respublica partııasynyń kóshbasshysy saılaýdan keıin málimdeme jasady. Ol Respublica partııasy saılaý nátıjelerin moıyndaıtynyn málimdedi.
Respublica partııasynyń tóraǵasy Aıdarbek Qojanazarov búgin elimiz úshin mańyzdy kún ekenin aıtty.
— Alǵash ret ótken Quryltaı saılaýy — Qazaqstannyń saıası ómirindegi tarıhı sát, el damýynyń jańa kezeńi der edim. Ózderińiz bilesizder, bıyl el bolyp, birtutas ult bolyp jańa Ata zań qabyldadyq. Biz jáne bizdiń jaqtastarymyz Prezıdent Qasym-Jomart Toqaev bastap bergen saıası reformalardy tolyq qoldaımyz. Respýblıka partııasy únemi osy tarıhı oqıǵalardyń, aýqymdy bastamalardyń bel ortasynda júr. Búgin mine, kúlli halqymyzben birge bolashaqqa nyq qadam jasap otyrmyz. Osy aıtýly kúnimen, saılaýdyń sátti ótýimen barshańyzdy shyn júrekten quttyqtaımyn! — dedi ol.
Aıdarbek Qojanazarov eń aldymen saılaýǵa qatysyp, óz tańdaýyn jasaǵan barsha Qazaqstan halqyna alǵys aıtty.
— Respublica partııasyna daýys bergen azamattarǵa erekshe rızashylyǵymdy bildiremiz. Sonymen birge basqa partııalardy tańdaǵan otandastarymyzdyń da sheshimine qurmetpen qaraımyz. Sebebi eldik iste ár azamattyń daýysy mańyzdy. Saılaýaldy kezeńde Respublica komandasy elimizdiń barlyq óńirin aralap, halyqpen kezdesti. Eldiń máselesin, usynysyn, bolashaqqa degen oıyn tyńdadyq. Osy kezdesýlerden biz halqymyzdyń ózgeriske, jańarýǵa jáne damýǵa degen úlken suranysyn kórdik, — dedi Respublica partııasynyń tóraǵasy.
Onyń sózinshe, Respýblıka partııasy búgin saılaý ashyq, ádil jáne zań talaptary saı ótti dep esepteıdi.
— Daýys berý aıaqtalyp, jańa ǵana exit poll-dyń alǵashqy nátıjelerin estidińizder. Bul — biz kútken nátıje. Qazaqstan azamattary belsendilik tanytyp, óz tańdaýyn jasap, konstıtýtsııalyq quqyǵyn júzege asyrdy. Biz búgin jaı ǵana saılaýǵa qatysyp otyrǵan joqpyz. Elimizdiń saıası tarıhyndaǵy jańa kezeńniń kýási bolyp, sol tarıhty Prezıdentimizben, halqymyzben birge jazyp jatyrmyz. Alda resmı qorytyndy bar. Halyq qandaı tańdaý jasasa da, biz oǵan qurmetpen qaraımyz. Al Respublica úshin elge qyzmet etý, halyqtyń sózin sóılep, naqty ózgeristerge jumys isteý jalǵasa beredi, — dep túıindedi Qojanazarov.
Buǵan deıin «Ádilet» partııasynyń tóraǵasy Aıbek Dádebaı saılaý qorytyndysy boıynsha saılaýshylarǵa úndeý jasady.
