Saılaý ádil ótedi dep senemin– Mońǵolııadan kelgen baqylaýshy

ASTANA. QazAqparat – Mońǵolııa atynan 19 naýryzda ótetin depýtattar saılaýyn baqylaýǵa kelgen Mońǵolııa Parlamentiniń múshesi Beısen Bulan Qazaqstandaǵy saıası naýqan ádil ótetinine senim bildirdi, dep habarlaıdy QazAqparat tilshisi.

«Ortalyq saılaý komıssııasynyń shaqyrýy boıynsha Monǵolııa elinen 2 adam keldik. Birinshisi – Mońǵolııa eliniń ortalyq saılaý komıssııa bastyǵy Pýrvee Delgenaran myrza. Ekinshisi – Monǵolııadaǵy Parlament múshesi Beısen Bulan», - dedi ol Ortalyq saılaý komıssııasynda ótken brıfıngide.

Onyń aıtýynsha, bul saılaýdyń qorytyndysy halyqtyń ómirinde tikeleı kórinis tabýy kerek.

«Saılaýdyń protsesin halyqaralyq baıqaýshy retinde baqylaımyz. Saılaý ádil, demokratııalyq jolda ótedi degenge senimimiz zor. Óıtkeni Májilis depýtattary demokratııalyq turǵyda saılansa, halqyna da paıdasy úlken dep oılaımyn. Biz Astana túbindegi saılaý okrýgterin baqylaýǵa daıynbyz», - dedi Mońǵolııa ókili.