«Saılaý ádil, ashyq jáne móldir ótýi tıis» - respýblıkalyq basylymdarǵa sholý
***
«Keshe Memleket basshysy Nursultan Nazarbaev Respýblıkalyq saılaýaldy qoǵamdyq shtabtyń múshelerimen kezdesý ótkizdi. Kezdesý «Nur Otan» HDP Ortalyq apparatynyń ǵımaratynda ótti. Memleket basshysy munda kelgennen keıin Respýblıkalyq qoǵamdyq shtabtyń jumysymen tanysty», - dep jazady «Egemen Qazaqstan» gazeti. Memleket basshysy úgit-nasıhat jumystaryn uıymdastyrý kezinde formaldi qadamnan aýlaq bolý qajettigin atap ótken. Úgit-nasıhat naýqanyna arnalǵan shyǵyndar tek qana saılaý qorynyń aıasynda júzege asyrylýy tıis. Sonymen qatar Elbasy saılaýaldy kezeńde qoldanystaǵy zańnamany qatań saqtaý qajettigin eskertken. Bul jaıynda gazettiń búgingi nómirindegi «Saılaý ádil, ashyq jáne móldir ótýi tıis» degen maqaladan tolyq maǵlumat ala alasyzdar.
Osy basylymnyń jazýynsha, keshe Brıýsselde Qazaqstan Respýblıkasy Táýelsizdiginiń 20 jyldyǵyn merekeleý jónindegi Memlekettik komıssııanyń tóraǵasy, QR Memlekettik hatshysy-Syrtqy ister mınıstri Qanat Saýdabaev Eýropa elderindegi Qazaqstan elshilerimen Eýrodaqtaǵy dıplomatııalyq jumystyń ózekti mindetteri men el táýelsizdiginiń 20 jyldyǵyn atap ótýge daıyndyq máselelerine arnalǵan keńes ótkizgen. Q.Saýdabaev óz sózinde Prezıdent N.Nazarbaevtyń Joldaýyna sáıkes, Qazaqstan eýropalyq baǵyttaǵy syrtqy saıası basymdyqtaryn anyqtap bergendigin atap kórsetken.
***
«Aıqyn» gazetinde Qazaqstan Respýblıkasynyń Reseı Federatsııasyndaǵy Tótenshe jáne ókiletti elshisi Zaýytbek Turysbekovpen aradaǵy suhbat «Birtutas ekonomıkalyq keńistik qurý isinde biz barynsha ilgeriledik» degen taqyryppen basyldy. Basylym tilshisiniń barlyq saýaldaryna tuşymdy jaýap bergen ol: «Birtutas ekonomıkalyq keńistik qurý isinde de biz barynsha ilgeriledik. Bul keńistik qazaqstandyq óndirýshiler úshin ónim ótkizýdiń baıtaq bazaryn ashyp, básekege shydas beretin taýarlar shyǵarý men qyzmet kórsetý úshin qazaqstandyq bıznesti yntalandyrady. Muny Qazaqstan men Reseıdiń saıası-ekonomıkalyq saladaǵy yntymaqtastyǵy taǵy bir satyǵa joǵarylady deýge bolady», - deıdi.
5 naýryzda ótetin Qazaqstan áıelderiniń tuńǵysh seziniń qarsańynda Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymy, Eńbek jáne halyqty áleýmettik qorǵaý mınıstri Gúlshara Ábdihalyqova Astana qalasynyń Balalar úıine arnaıy baryp, qaıyrymdylyq sharasyn ótkizdi. Osy jaıt «Aıqyn» gazetinde jarııalanǵan «Mınıstr Balalar úıine bardy» degen taqyryptaǵy maqalaǵa arqaý bolǵan.
***
«Saýatsyz zań jobalarynan qutylar kún týar ma eken deýshi edik. Ol kún de alys emes sııaqty. Keshe Ádilet mınıstrligi osyndaı bir jaǵymdy jańalyqtyń shetin shyǵaryp qaldy. Zań jobalarymyz endi qazaq jáne orys tilindegi túpnusqalary boıynsha ǵylymı lıngvıstıkalyq saraptamadan ótetin bolypty», - dep jazady «Alash aınasy» gazeti. Basylymnyń atap ótýinshe, budan bylaı zań jobasyn qarastyrý úshin qurylǵan jumys tobynyń quramyna mindetti túrde ǵalymdar tarylmaq. Maqalaǵa ózek bolǵan jaıt jaıynda tolyq bilgińiz kelse, «Saýatsyz zańnan qutylatyn kún jaqyn ba?» degen maqala nazaryńyzdan tys qalmasyn.
«Alash aınasy» gazetiniń turaqty «Dat!» aıdarynda Qarjy mınıstri Bolat Jámishevpen aradaǵy suhbat «Qazirgi tańdaǵy eń mańyzdy másele - «Memlekettik satyp alý týraly» Zańdy jetildirý» degen taqyryppen berilgen. Qazaqstan TMD elderi ishinde daǵdarystyń yqpalyn álsiretýge baǵyttalǵan baǵdarlamalardy birinshi bolyp qabyldaǵan el ekendigin basa aıtqan ol: «Qazirde óndiristiń kúretamyryna qan júgirtýge septigin tıgizetin óndiris oshaǵy, zaýyt qurylysy, saýda-logıstıkalyq ortalyqtar ashý týraly ınvestıtsııalyq sheshimder qabyldanýda. Ańǵarǵanǵa munyń barlyǵy ishki naryqtyń aýqymyn keńeıtetin dúnıeler. Óndiris oryndaryn ashý men taýar aınalymy - jańa jumys kózin tabýdyń birden-bir kepili», - deıdi.
***
«Kazahstanskaıa pravda» gazetiniń jazýynsha, keshe Memleket basshysy Nursultan Nazarbaev Reseı Prezıdenti Dmıtrıı Medvedevpen telefon arqyly sóılesti. «Kóshbasshylar Qazaqstan-Reseı qarym-qatynastarynyń ártúrli qyrlaryn, sonymen qatar TMD-nyń qurylǵanyna 20 jyl tolýyna arnalǵan mereıtoılyq sammıtti ótkizý máselesin talqylady», - dep jazady basylym.
