Saılaý-2026: Shetelde júrgen 228 otandasymyz daýys berdi
ASTANA. KAZINFORM — Quryltaı depýtattary saılaýynda 11 myńnan astam otandasymyz shet elde daýys beredi. Qazirgi ýaqyttyń olardyń 228-i tańdaý jasap úlgerdi. Bul týraly Syrtqy ister mınıstriniń orynbasary Arman Isetov málim etti.
— Qazaqstan Respýblıkasy Quryltaıy depýtattaryn saılaýǵa shetelde júrgen azamattarymyzdyń konstıtýtsııalyq quqyǵyn júzege asyrýyn qamtamasyz etý maqsatynda Qazaqstannyń sheteldegi mekemeleriniń janynan 61 memlekette 79 saılaý ýchaskesi quryldy. Tirkelgen saılaýshylardyń jalpy sany — 11 402 adam. Saǵat 08:00–degi jaǵdaı boıynsha shetelde 26 saılaý ýchaskesi ashyldy. Alǵashqy bolyp daýys berýdi Tokıo men Seýl qalalaryndaǵy otandastarymyz bastady. Jalpy osy ýaqytqa deıin saılaý ýchaskelerine kelip, daýys bergender sany — 228 adam, — dedi Arman Isetov.
Saǵat 07:00–degi jaǵdaı boıynsha óńirlerde 10 363 saılaý ýchaskesi daýys berýge kiristi. Quryltaı saılaýyna qatysty barlyq jańalyqpen myna siltemege ótip oqı alasyzdar. Elimizde tarıhı Quryltaı saılaýynda 145 depýtattyq mandatqa «Ádilet», JSDP, «Baıtaq», QHP, «Aýyl» partııasy, «Aq jol» jáne Respublica — barlyǵy 7 partııadan 545 kandıdat tirkelgen.
