Saılaý-2026: onlaın-servıster iske qosylady
ASTANA. KAZINFORM – Qazaqstanda saılaýshylarǵa arnalǵan onlaın-servıster iske qosylady. Bul týraly búgin Ortalyq saılaý komıssııasynyń otyrysynda OSK Tóraǵasynyń orynbasary Muhtar Erman aıtty.
Osy servısterdiń kómegimen ýchaskelik saılaý komıssııalarynyń músheleri azamattyń tirkelgen mekenjaıyn teksere alady. Bul ony saılaýshylar tizimine engizý úshin qajet. Ol úshin azamat tıisti ótinishpen júginýi tıis. Ekinshi servıs tirkeýi joq azamattarǵa saılaý ýchaskesiniń mekenjaıy boıynsha ýaqytsha tirkeýge turýǵa múmkindik beredi. Atalǵan eki servıs te qazaqstandyqtardyń saılaý quqyǵyn iske asyrýyna járdemdesýge baǵyttalǵan.
- eGov portaly arqyly servıske qol jetkizý quqyǵy berilgen ýchaskelik saılaý komıssııalarynyń músheleri azamattyń jazbasha ótinishi negizinde onyń turaqty tirkelgen mekenjaıy týraly málimet ala alady. Eger ótinish berýshiniń turaqty tirkelgen turǵylyqty jeri tıisti saılaý ýchaskesiniń shekarasy aýmaǵynda ekeni rastalsa, komıssııa ony saılaýshylar tizimine engizý týraly sheshim qabyldaıdy. Bul servıs 5106 saılaý ýchaskesinde qoljetimdi bolady. Sondaı-aq turǵylyqty jeri boıynsha tirkeýden shyǵarylǵan jáne buryn saılaýshylar tizimine engizilmegen azamattardyń saılaý quqyǵyn iske asyrý maqsatynda daýys berý kúni olardy saılaý ýchaskesi ornalasqan mekenjaı boıynsha ýaqytsha tirkeýge jol beriledi, - dedi Muhtar Erman.
Otyrysta azamattardy birneshe ret tirkeýge jol bermeý jáne baqylaý tetikterine de erekshe nazar aýdaryldy. Aıta keteıik, bul jobalardy Ortalyq saılaý komıssııasy, Jasandy ıntellekt jáne tsıfrlyq damý mınıstrligi, Іshki ister mınıstrligi birlesip júzege asyryp jatyr.
Budan buryn habarlanǵandaı, el aýmaǵynda ýchaskelik saılaý komıssııalary jumysyna kiristi.
