Saılaý-2026: «Jibek Joly» arnasyndaǵy komandalyq teledebattyń birinshi kezeńi aıaqtaldy
ASTANA. KAZINFORM – Tuńǵysh Quryltaı saılaýyna qatysatyn saıası partııa ókilderi «Jibek Joly» telearnasynyń tikeleı efırinde pikir saıystyryp jatyr.
Komandalyq pikirsaıystyń birinshi kezeńi máresine jetti. «Taldaý» kezeńinde ár partııa ókilderi óz ustanymyn ǵana emes, básekelesteriniń baǵdarlamasyna da synı kózqarasyn bildirýge múmkindik aldy. Ol úshin pikirsaıysshylarǵa 2 mınýt 30 sekýndtan ýaqyt berildi. Partııalar bul ýaqytty óz ustanymdary qazaq jáne orys tilinde qatar berýge jumsady.
«Aq jol» partııasynyń ókili Bek-Muhamed Jáýkebaev óziniń moınynda nesıesi bar ekenin aıtty. Al Ermek Ábildın JSDP partııasyn bıznesti salyqpen qysýǵa baǵyttalǵan saıasat ustanady dep synap ótti.
JSDP atynan shyqqan Larısa Lı Qazaqstan Halyq partııasy kóp jyldan beri sózýarlyqpen aınalysyp kele jatyr degen pikir aıtty.
«Ádilet» partııasynyń sózustary Mádı Myrzaǵaraev óz ustanymdary Ata zańnyń jańa redaktsııasymn úndesip jatqanyn atap ótti. Aıjan Aımaǵanova kez kelgen saıası bastama halyq ılanbasa, nátıje bermeıtinin eske saldy.
Qazaqstan Halyq partııasynyń ókili Irına Smırnova Quryltaı saılaýyna túsetin ózge partııalardyń ózi osal dep tanıtyn tustaryna toqtaldy.
«Aýyl» partııasynyń týyn ustaǵan Erbolat Saýryqov aýyl men qala arasyndaǵy alshaqtyqty joıýdyń joldary partııa baǵdarlamasynyń ón boıynda tunyp turǵanyn aıtty. Jazıra Sultanqulova JSDP ustanymdaryn synaı kelip, Qazaqstan Halyq partııasynyń baǵdarlamasyndaǵy urandardy «qorqynyshty» dep baǵalady.
«Baıtaq» partııasynyń pikirsaıysshysy Amalbek Ómirtaı ekologııa salasynda ózderi anyqtaǵan iri zań buzý faktilerin atap, sondaı problemalardy qalaısha júıeli joıýǵa bolatynyn baıandady.
Respublica partııasynyń ókili Oljas Quspekov qarsylas partııalardy synmen túıreı ótip, «eski partııalardyń dáýreni ótkeni týraly ótkir pikir aıtty.
Keı partııa ókilderi berilgen ýaqyttyń ár sekýndyn tıimdi paıdalanyp, ekrandaǵy saǵat tilimen birge toqtasa, keı qatysýshylar óz oıyn berilgen ýaqytqa syıǵyza almaı jatty. Partııalastaryn jaqtaý úshin debat alańyna jınalǵan jankúıerlerdiń belsendiligin erekshe atap ótýge bolady. Jaqtastarynyń árbir sátti sózin qıqýmen qarsy alyp, múlt ketken tusyn qoshemet-qoldaýmen bildirmeı ketýge baryn salyp jatyr.
Aıta ketý kerek, búgingi komandalyq teledebattyń negizgi taqyryby – «Zań men tártip – Ádiletti Qazaqstannyń negizi».
Buǵan deıin pikirsaıysqa qatysatyn partııa ókilderiniń sóz sóıleý reti de «Jibek Joly» telearnasynyń tikeleı efırinde jerebe arqyly anyqtalǵan bolatyn.
Pikirsaıysshylar osy ret boıynsha sóılep shyqty.
Teledebatty «Jibek Joly» telearnasynan bólek, Jibek Joly TV jáne rezervtik Jibek Joly News YouTube arnalary da kórsetedi. Kórermender tarapynan partııa ókilderine suraq týyndap jatsa, ekranda kórsetilgen WhatsApp nómirine joldaı alady.
