Saılaý-2023: Erlan Qoshanov óz tańdaýyn jasady

ASTANA. QazAqparat – Búgin Májilis jáne máslıhat depýtattaryn saılaýda elordada «Amanat» partııasynyń tóraǵasy Erlan Qoshanov daýys berdi, dep habarlaıdy QazAqparat tilshisi.

E. Qoshanov Astanadaǵy «Qazaqstan temir joly» ulttyq kompanııasynyń ǵımaratynda ornalasqan №110 saılaý ýchaskesine baryp, óz tańdaýyn jasady.

«Saılaýdy uıymdastyrý óte joǵary deńgeıde. Halyq daýys berýge belsendi túrde baryp jatyr. Halyqtyń saıası ómirge aralasýy qarqyny da jaqsy», - dedi partııa tóraǵasy.

Osy oraıda ol saılaýdyń ádil ótetinine senimdi ekenin aıtty.

«Saılaýdaǵy daýys berý protsesin baıqaýshylar egjeı-tegjeıli qarap otyr. Sondyqtan saılaý ádil ótetinine esh kúmán joq», - dedi E. Qoshanov.

Budan buryn habarlanǵandaı, búgin Qazaqstanda Májilis pen máslıhat depýtattaryn saılaý bastaldy.