Saılaý-2022: Jıgýlı Daırabaev Túrkistan oblysynyń fermerlerimen kezdesti

ASTANA. QazAqparat – Qazaqstan Respýblıkasynyń prezıdenttigine kandıdat Jıgýlı Daırabaev saılaýaldy úgit-nasıhat aıasynda Túrkistan oblysynyń aýyl sharýashylyǵy óndirýshilerimen kezdesti. Kezdesýge iri sharýa qojalyqtarynyń basshylary, qarapaıym fermerler, maqta ósirýshiler men dıqandar qatysty. Bul týraly «Aýyl» halyqtyq-demokratııalyq patrıottyq partııasynyń baspasóz qyzmetinen habarlady.

Kandıdat Jıgýlı Daırabaev kezdesý barysynda aýyl sharýashylyǵy óndirýshileri úshin qarjylandyrýdyń, jer jáne tehnıkalyq resýrstardyń qoljetimdiligi máselelerin qozǵady. Túrkistan oblysy fermerlerdiń kóp shoǵyrlanýymen jáne AÓK qurylymyndaǵy úı sharýashylyqtary úlesimen erekshelenetindikten, bul – óńir úshin erekshe ótkir problema.

Kezdesýde fermerler sý tapshylyǵy jaıly alańdaýshylyqtarymen bólisti. Olardyń aıtýynsha, bul másele jyl saıyn órship keledi. Oblystyń maqta ósirýshileri de óz problemalaryn aıtty. Bıyl Túrkistan oblysynda 125 myń gektardan astam jerge maqta egildi, agrarshylar 300 myń tonna ónim jınaýdy josparlap otyr.

Aıta keteıik, buǵan deıin QR Ortalyq saılaý komıssııasy Jıgýlı Daırabaevty prezıdent saılaýyna kandıdat retinde resmı tirkegenin jazǵan edik.

Saılaý aldyndaǵy úgit-nasıhat 2022 jylǵy 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al, 20 qarashada Prezıdent saılaýy ótedi.