Saılaý-2022: jeti uıym qoǵamdyq saýalnama júrgizý quqyǵyna ıe

ASTANA. QazAqparat – QR Ortalyq saılaý komıssııasynyń tóraǵasy Nurlan Ábdirov kezekten tys QR Prezıdenti saılaýyna qatysty qoǵam pikirin bilip, saýal júrgizetin uıymdardy atady, dep habarlaıdy QazAqparat tilshisi.

«Búginge deıin 7 uıym 20 qarashada ótetin kezekten tys QR Prezıdenti saılaýyna qatysty qoǵamdyq saýalnama júrgizetindigi týraly bizdi habardar etti.

«QR Saılaý týraly» Konstıtýtsııalyq zańnyń normalaryna sáıkes qoǵamdyq saýalnama nátıjesi, saılaýǵa qatysty boljam men zertteýlerdi, sol sııaqty kandıdattardy qoldaýǵa baǵyttalǵan materıaldardy ınternette jarııalaýdy saılaýǵa deıin 5 kúnniń ishinde toqtatý qajet. ıAǵnı búgin qoǵamdyq saýalnama nátıjelerin jarııalaýdyń sońǵy kúni. Erteńnen bastap bastap qoǵam pikiri nátıjesin jarııalaýǵa jáne qaıta basyp shyǵarýǵa tyıym salynady», - dedi Nurlan Ábdirov Ortalyq saılaý komıssııasynyń otyrysynda.

Sondaı-aq, OSK tóraǵasy saılaý týraly qoǵamdyq saýalnama júrgizýge quqyly uıymdardy atady.

Olardyń qatarynda «Qoǵamdyq pikir» zertteý ınstıtýty, «AMANAT» partııasynyń qoǵamdyq saıasat ınstıtýty, «Jastar» ǵylymı-zertteý ortalyǵy, «Demokratııa ınstıtýty» ǵylymı-zertteý qaýymdastyǵy, Astana «SOTsIS-A» keshendi áleýmettik zertteýler ınstıtýty, DAMU RG zertteý toby jáne «Ashyq qoǵam» aımaqtyq zertteýler halyqaralyq ınstıtýty bar.

Aıta ketsek, elimizdiń Bas prokýratýrasy saılaýǵa baılanysty qoǵamdyq pikirge saýal salýdy júrgizý tártibi zańmen qatań retteletindigin eske salǵan edi.