Saılaý-2022: Saltanat Tursynbekova teledebatta besinshi bolyp sóz alady

ASTANA. QazAqparat – Búgin saǵat 20:00-de «Habar» telearnasynyń tikeleı efırinde Ortalyq saılaý komıssııasynyń uıymdastyrýymen Qazaqstan prezıdenttigine kandıdattardyń jáne olardyń senimdi ókilderiniń qatysýymen televızııalyq debat ótedi, dep habarlaıdy QazAqparat.

Osy shara qarsańynda Astanada jerebe tastaldy, onda prezıdenttikke kandıdattardyń teledebatynda sóz sóıleý tártibi anyqtaldy. Resmı sharaǵa barlyq úmitkerlerdiń shtab basshylary qatysyp, rettik nómirlerin tańdady.

Jerebe nátıjesinde quqyq qorǵaýshy Saltanat Tursynbekova besinshi bolyp sóz sóıleıtini belgili boldy, dep habarlady kandıdattyń shtabynan.

Teledebatta úmitkerler saılaýaldy baǵdarlamalarymen tanystyryp, bir-birine suraqtar qoıady, sondaı-aq qazaqstandyqtardyń saýaldaryna jaýap beredi.

Esterińizge sala keteıik, saılaý aldyndaǵy úgit-nasıhat 2022 jylǵy 21 qazanda bastaldy jáne saılaýdan bir kún buryn, ıaǵnı 19 qarashada aıaqtalady. 19 qarasha – respýblıka boıynsha tynyshtyq kúni. Al 20 qarashada prezıdent saılaýy ótedi.