Saılaý - 2022: Meıram Qajyken halyq qolynyń túgel eseptelmeýine qatysty pikir bildirdi

ASTANA. QazAqparat – QR Prezıdenttigine úmitker Meıram Qajyken ortalyq saılaý komıssııasy onyń kandıdatýrasyn tirkegennen keıin BAQ ókilderiniń suraqtaryna jaýap berdi, dep habarlaıdy QazAqparat tilshisi.

«Aldymen «Amanat» Qazaqstan kásipodaqtar dostastyǵy» birlestiginiń maǵan senim artqanyna alǵys aıtamyn. Bul men úshin úlken jaýapkershilik, aıtýly synaq», - dedi Meıram Qajeken OSK-da ótken baspasóz máslıhatynda.

Sondaı-aq, Prezıdenttikke kandıdat halyqtan qol jınaýda barlyǵynyń eseptelmeýine qatysty pikir bildirdi. Osy tusta aıta ketsek, M. Qajekenke senimdilik tanytqan 122 184 qol jınalyp, onyń 120 055-i rastalyp, qabyldandy. Bul týraly ortalyq saılaý komıssııasynyń otyrysynda belgili boldy.

«Múmkin, qate ketken shyǵar. Álde bireýler JSN-nyń ornyna jeke kýálik nómirin jazyp jiberdi me? Jeke óz basym 230 qol jınadym. Shtab jáne kásipodaq músheleri óńirlerdi aralady. Árıne, qol jınaýdyń alǵashqy sátinde qıyndyq boldy. Ásirese uıymdastyrý jaǵynan. Sebebi mundaı jumysty alǵash ret ótkizdik. Keıin jumys júre bastady», - deıdi ol.

Onyń aıtýynsha, senimdi ókilderi úgit-nasıhat jumysyna daıyn.

«Búgin demalyp, dúısenbiden bastap Qazaqstan boıynsha úgit-nasıhat jumysyn júrgizýdiń josparyn qurýǵa kirisemin. Oǵan zańmen tyıym salynbaǵan. Úgit-nasıhat barysynda qol jınaý kezinde jiberilgen qatelikterdi qaıtalamaýǵa tyrysamyz», - dedi Prezıdenttikke úmitker Meıram Qajyken.

Aıta keteıik, búgin Ortalyq saılaý komıssııasy Meıram Qajykendi «Amanat» Qazaqstan kásipodaqtar dostastyǵy» respýblıkalyq birlestigi atynan Prezıdenttikke kandıdat retinde tirkedi.