Saılaý-2021: Túrkistan oblysynda COVID-19 juqtyrǵandar daýys berdi
TÚRKІSTAN. QazAqparat - Túrkistan oblysynda koronavırýs juqtyrǵandar QR Parlamenti Májilisi jáne máslıhattary depýtattarynyń saılaýynda saqtyq sharalaryn qatań ustanyp, daýys berýde, dep habarlaıdy QazAqparat.
Túrkistan oblysy ákiminiń baspasóz qyzmeti taratqan aqparatqa qaraǵanda, Saryaǵash ortalyq aýrýhanasyndaǵy otyz naýqas saılaýǵa qatysqan. Onyń ishinde jıyrma segizi pnevmonııamen aýyrǵan bolsa, ekeýi koronovırýs juqtyrǵan. Sondaı-aq, Leńgir qalalyq aýrýhanasynda pnevmonııamen jatqan on úsh naýqas daýys berdi. Jetisaı aýdandyq ortalyq aýrýhanasyndaǵy jıyrma naýqas saılaýǵa qatysýǵa nıet bildirgen.
Aıta keteıik, mundaı daýys berýdi baılanyssyz tásilmen, mysaly, saty alańynda (úı mańyndaǵy aýmaqta) qatysýshy daýys berýge arnalǵan bıýlletendi jáne úı-jaıdan tys jerde daýys berý týraly ótinish tasymaldanatyn jáshikke salý arqyly ótkizgen.
Alaıda daýys berýge arnalǵan bıýlletendi alǵanǵa deıin daýys berýge qatysýshy maska taǵyp, qolyn antıseptıkpen dezınfektsııalaýy tıis.
Ýchaskelik komıssııa músheleri mindetti túrde qoldaryn, tasymaldanatyn jáshikti dezınfektsııalaýy kerek. Jeke qorǵanysh quraldaryn ekinshi ret paıdalanýǵa bolmaıdy, kórsetilgen jeke qorǵanysh quraldary tyǵyz jabylatyn konteınerge nemese odan ári kádege jaratý úshin bakqa salynýy tıis.
