Saılaý-2021: Shetelde júrgen 4 532 Qazaqstan azamaty daýys berdi
NUR-SULTAN. QazAqparat – Shetelde júrgen 4 532 Qazaqstan azamaty daýys berdi. Bul týraly QR Syrtqy ister mınıstriniń birinshi orynbasary Shahrat Nuryshev aıtty, dep habarlaıdy QazAqparat tilshisi.
«Qazaqstan Respýblıkasyndaǵy saılaý týraly» konstıtýtsııalyq zańǵa sáıkes, daýys berý jergilikti ýaqyt boıynsha saǵat 07-00-den 20-00-ge deıin ótkiziledi. Saǵat 19-00-degi jaǵdaı boıynsha shetelde jalpy alǵanda 4 532 Qazaqstan azamaty daýys berdi. Túrli ýaqyt beldeýlerinde ornalasýyn eskere otyryp, Japonııa men Koreıa Respýblıkasynda júrgen azamattar birinshi bolyp daýys berdi», - dedi ol.
Onyń atap ótýinshe, qazirgi ýaqytta 10 saılaý ýchaskesinde daýys berý aıaqtaldy. Qalǵan 56 saılaý ýchaskesinde daýys berý jalǵasyp jatyr.
«Sońǵy bolyp osy jyldyń 11 qańtarynda Nur-Sultan ýaqyty boıynsha tańǵy saǵat 07-00-de Amerıka Qurama Shtattary men Kanadaǵy Qazaqstan azamattary daýys berýdi aıaqtaıdy», - dedi Shahrat Nuryshev.
