Saılaý-2021: Qaraǵandynyń eń qart turǵyndarynyń biri daýys berdi
QARAǴANDY. QazAqparat – Qaraǵandy qalasynyń eń qart turǵyndarynyń biri, Ekinshi dúnıejúzilik soǵys ardageri, 97 jastaǵy Búrkit Esjanov Parlament Májilisine jáne barlyq deńgeıdegi máslıhattarǵa depýtattardy saılaýǵa qatysty, dep habarlaıdy QazAqparat tilshisi.
«Kógildir toǵandar» shaǵyn aýdanyndaǵy 77 JOBBM №169 saılaý ýchaskesine ol tańǵy saǵat 7-de jubaıymen birge keldi.
Ardagerdiń aıtýynsha, ýchaske barlyq qajetti zattarmen jabdyqtalǵan, sanıtarlyq talaptar saqtalǵan jáne daýys berý úshin yńǵaıly jaǵdaı jasalǵan.
«Saılaý – bizdiń bolashaǵymyzǵa, halyqtyń órkendeýine jol ashatyn qadam. Sondyqtan, ózimiz tańdaǵan partııaǵa daýys berdik. Men saılaýǵa áıelimmen keldim. Bizde bári jaqsy bolady dep oılaımyn», - dep atap ótti aqsaqal Búrkit Esjanov.
Qaraǵandy oblysyndaǵy barlyq saılaý ýchaskeleri múmkindigi shekteýli adamdardyń qajettilikterine jáne sanıtarlyq talaptarǵa sáıkes jabdyqtaldy.
