Saılaý-2021: Elektoraldyq oqýǵa 70 myńnan astam adam qatysady

NUR-SULTAN. QazAqparat – Qazaqstanda ýchaskelik jáne aýmaqtyq saılaý komıssııalarynyń 70 myńnan astam múshesi elektoraldy oqytýdan ótedi. Bul týraly Ortalyq saılaý komıssııasynyń hatshysy Sábıla Mustafına aıtyp berdi, dep habarlaıdy QazAqparat tilshisi.

Ortalyq saılaý komıssııasynyń usynymymen kaskadty model boıynsha tómen turǵan komıssııalardy oqytýdy kózdeıtin jospar qurylǵan.

«Mundaı model Eýropa qaýipsizdik jáne yntymaqtastyq uıymynyń kóptegen elderinde qoldanylady. QR Ortalyq saılaý komıssııasynyń tapsyrysymen kásibı negizde ázirlengen oqý-ádistemelik materıaldar oqytýdyń ádistemelik bazasyna negiz boldy, olar OSK saıtyna ornalastyryldy. OSK elektrondyq sertıfıkattaryn berýge jáne saılaý komıssııalarynyń múshelerine ázirlengen qashyqtan oqytý men testileý júıesin paıdalanýǵa erekshe nazar aýdaryldy. QR Saılaý júıesi ýchaskelik jáne aýmaqtyq saılaý komıssııalarynyń 70 myńnan astam múshesin qamtıdy. Qashyqtyqtan oqytý formaty 2018 jyly oqytýdyń jeke baǵyty retinde qabyldanǵan», - dedi Ortalyq saılaý komıssııasynyń hatshysy S. Mustafına komıssııada ótken otyrysta.

Otyrys barysynda Ortalyq saılaý komıssııasynyń tóraǵasy Berik Imashev pandemııa kezeńinde qashyqtan oqytýdyń mańyzdylyǵyn atap ótti.

«Saılaýdy uıymdastyrýshylar men saılaý protsesiniń basqa da qatysýshylaryn elektoraldy oqytý – saılaý protsesiniń mańyzdy quramdas bólikteriniń biri bolyp sanalady. Saılaý protsesine qatysýshylardy qashyqtan oqytýdyń damyǵan jáne engizilgen júıesi pandemııa jaǵdaıynda belsendi qoldanylady», - dedi Berik Imashev.