Saılaý-2019: Sarapshylar Qazaqstan saıasatynyń negizgi qyrlaryn talqylady

NUR-SULTAN. QazAqparat - QR Prezıdenti janyndaǵy Qazaqstan strategııalyq zertteýler ınstıtýtynda «Qazaqstandaǵy saılaý-2019: syrtqy jáne ishki saıasattaǵy sabaqtastyq pen turaqtylyq» atty saraptamalyq talqylaý ótti, dep habarlaıdy QazAqparat tilshisi ınstıtýttyń málimetine silteme jasap.

Jıyn barysynda sarapshylar saılaý qarsańyndaǵy Qazaqstannyń ishki jáne syrtqy saıasatynyń negizgi qyrlaryna toqtaldy. Sharany ashqan QR Prezıdenti janyndaǵy QSZI dırektory Zarema Sháýkenova saılaýdyń der kezinde ótkeli otyrǵanyn, sonyń nátıjesi boıynsha eldiń damý baǵyty aıqyndalatynyn atady.

Al áleýmettik jumys jónindegi ulttyq resýrstyq ortalyq dırektory Lázzat Nuruqatova memlekettiń áleýmettik bastamalardy jalǵastyryp, qazaqstandyqtardyń ómir sapasyn arttyrý qadamdarynyń mańyzyna toqtaldy.

Ortalyq Azııa aımaǵyndaǵy ultaralyq jáne konfessııaaralyq qatynastardy zertteý ortalyǵynyń dırektory Aıgúl Sádýaqasova eldegi jan-jaqty turaqtylyq - damýdyń negizgi tetigi bolyp qala berýi kerektigin aıtty.

QSZI dırektorynyń orynbasary Sanat Kóshkimbaev bolsa, saılaý qorytyndysy syrtqy saıasattaǵy baǵyttarǵa serpin berip, Qazaqstannyń halyqaralyq arenadaǵy seriktes retindegi bedelin bekemdeı túsedi degen pikir bildirdi.

Ózekti taqyryp tóńiregindegi talqylaýǵa Azııa zertteýler ınstıtýtynyń dırektory Sultan Ákimbekov, «Qoǵamdyq pikir» zertteý ınstıtýtynyń jobalar jónindegi dırektory Botagóz Raqysheva, «Qasıetti Qazaqstan» ǵylymı-zertteý ortalyǵynyń basshysy Berik Ábdiǵalıuly, Ulttyq ǵylymı-praktıkalyq ortalyqtyń basqarma basshysy Anar Fazyljan, qoǵam qaıratkeri, bloger Ǵalym Baıtoq jáne taǵy basqa sarapshylar belsendi qatysyp, qundy pikirler aıtty.