Saılaý-2019: QR OSK janynan qurylatyn lıngvıstıkalyq komıssııaǵa kim múshe bola alady

NUR-SULTAN. QazAqparat - QR Ortalyq saılaý komıssııasy janynan el prezıdenttigine kandıdattyń memlekettik tildi meńgerý deńgeıin anyqtaıtyn lıngvıstıkalyq komıssııa qurylady. Bul týraly QR Ortalyq saılaý komıssııasynyń múshesi Lázzat Súleımen aıtty, dep habarlaıdy QazAqparat tilshisi.

«Konstıtýtsııalyq keńestiń «QR Prezıdenttigine kandıdattyń memlekettik tildi meńgerý deńgeıi qalaı aıqyndalady» degen suraqqa bergen jaýaby bar. Ol jerde kandıdatqa saýatty oqı alý, jaza alý jáne óz oıyn esh qıyndyqsyz jetkize alý talaby týraly aıtylady. Kandıdattyń memlekettik tildi jetik meńgergendigi QR Ortalyq saılaý komıssııasy quratyn lıngvıstıkalyq komıssııanyń qorytyndysymen aıqyndalady. Lıngvıstıkalyq komıssııaǵa til salasynyń mamandary kiredi. Bul komıssııa kandıdattyń memlekettik tildi meńgergendigin aıqyndaıtyn barlyq sharalaryn júzege asyrady», - dedi ol búgin komıssııa otyrysy barysynda BAQ ókilderiniń saýalyna oraı.

Onyń atap ótýinshe, OSK QR Bilim jáne ǵylym, Mádenıet jáne sport mınıstrlikteriniń, joǵary oqý oryndarynyń basshylarymen kezdesip, tanymal lıngvıstterdi, ádebıetshilerdi atalǵan komıssııaǵa múshelikke tartatyn bolady. Al prezıdenttikke kandıdatqa qazaq tilinde jaza alý, oqı alý jáne lıngvıstkalyq komıssııa usynǵan taqyryp aıasynda kópshilik aldynda 15 mınýt sóıleý syndy talaptar qoıylady.

«Shyǵarma jazýǵa 1 saǵat ýaqyt, kandıdat qajet etse, taǵy 1 saǵat ýaqyt qosymsha beriledi. Odan keıin belgili bir shyǵarmany saýatty oqýǵa jáne kópshilik aldynda 15 mınýt sóz sóıleýge daıyndalýǵa da bir saǵattan ýaqyt bólinedi. Máselen, ótken saılaýda shyǵarma jazý úshin «Meniń elim», «Týǵan jerim», «Qazaq halqynyń rýhanı qundylyqtary» syndy taqyryptar berildi. Al oqýǵa Abaı Qunanbaevtyń, Maǵjan Jumabaevtyń, Júsipbek Aımaýytovtyń, Muqaǵalıdyń, Farızanyń poezııalary usynylǵan edi», - dedi L.Súleımen.