Saılaý-2019: Kandıdattardyń televızııalyq pikirtalasyna 41 mln teńge jumsalady

NUR-SULTAN. QazAqparat - QR Prezıdenttigine kandıdattar arasynda televızııalyq pikirtalas ótkizýge 41 mln teńge qarajat bólinedi. Bul týraly búgin QR OSK múshesi Lázzat Súleımen aıtty, dep habarlaıdy QazAqparat tilshisi.

«Birinshiden, biz ókiletti organǵa, Aqparat jáne qoǵamdyq damý mınıstrligine hat jazyp, pikirtalasty jáne pikirsaıysty ótkizýge tehnıkalyq múmkindigi bar, qoǵamdyq qamtý aýqymy úlken telearnany aıqyndaýdy suraǵan edik. Sodan bizge «Habar» agenttigi usynyldy. Ekinshiden, pikirtalas pen pikirsaıysty ótkizýge 41 mln teńge qarajat qarastyrylyp otyr. Ortalyq saılaý komıssııasy arnaıy kelisimshartqa otyrýdy tapsyrdy. Ol naqtylanatyn bolady», - dedi Lázzat Súleımen.

Aıta keteıik, búgin QR OSK Qazaqstan Prezıdentiniń kezekten tys saılaýynda saılaý aldyndaǵy pikirtalastar men pikirsaıystar ótkizý týraly qaýlyny qabylady. Oǵan sáıkes televızııalyq pikirtalastar men pikirsaıystar 2019 jylǵy 29 mamyrda Nur-Sultan qalasynda «Habar» agenttigi AQ-nyń televızııalyq arnasy efırinde kórsetiledi.