Saılaý-2019: Halqymyz memleket taǵdyryna beı-jaı qaramaıdy - mınıstr Abaev

NUR-SULTAN. QazAqparat - 9 maýsymda bizdiń halqymyz memleket taǵdyryna beı-jaı qaramaıtynyn kórseter degen senimdemiz. Aqparat jáne qoǵamdyq damý mınıstri Dáýren Abaev osylaı dedi, dep habarlaıdy QazAqparat tilshisi.

«Saılaý týraly órlene sóılep, rýhtandyrar sózderdi aıtqym kelmeıdi. Saılaý - azamattyń mindettemesi emes. Ol - onyń quqyǵy. Ol quqyqty paıdalaný nemese paıdalanbaý - árkimniń óz isi. Árbir azamat ózi úshin qandaı memlekette turǵysy keletinin nemese balalary qandaı elde turatynyn sheshýi kerek. Bilesiz be, Sherhana Murtazanyń «Otandy, ultty, ádebıetti, onyń bolashaǵyn súıý úshin kóp aıqaıdyń keregi joq. Tynymsyz janashyr, tabandy áreket qajet» degen sózi bar. Sondyqtan, saılaýǵa baryp, durys tańdaý jasaý - halqymyzdyń oń áreketi bolar edi. «Asúıde» otyryp alyp, óz daýysyńnyń mańyzy týraly fılofııalyq oılardy qarsha borata berýge bolady. Biraq, ol daýystyń saılaý jáshigine túspeı salmaǵy bolmasy anyq», - dedi Dáýren Abaev Habar arnasyndaǵy «Ashyq dıalog» baǵdarlamasynda.

Mınıstr óz sózinde táýelsizdik alǵaly beri Qazaqstan halqy prezıdent saılaýǵa joǵary dárejede kelgenin pash etkenin atap ótti.

«Meniń oıymsha, bul - óz-ózińe, qoǵamǵa degen qurmet. Sondyqtan, 9 maýsymda bizdiń halqymyz memleket taǵdyryna beı-jaı qaramaıtynyn kórseter degen senimdemiz», - dedi Dáýren Abaev.