Saılaý-2019: Elordada kandıdattardyń úgittik baspa materıaldaryna arnalǵan 60 oryn belgilenedi
Komıssııa otyrysynda atalǵan másele boıynsha baıandama jasaǵan Nur-Sultan qalasy ákimi apparaty basshysynyń orynbasary Azamat Ahmedjanovtyń aıtýynsha, "QR Prezıdentiniń kezekten tys saılaýyn taǵaıyndaý týraly" QR Prezıdentiniń 2019 jylǵy 9 sáýirdegi №18 Jarlyǵynyń qabyldanýyna baılanysty jáne "Qazaqstan Respýblıkasyndaǵy saılaý týraly" 1995 jylǵy 25 qyrkúıektegi QR Konstıtýtsııalyq zańynyń 28 babyna sáıkes jergilikti atqarýshy organdar tıisti saılaý komıssııalarymen birlesip, barlyq kandıdattar úshin úgittik baspa materıaldaryn ornalastyrý ornyn belgileıdi. Sonymen qatar kandıdattarǵa saılaýshylarmen kezdesý úshin sharttyq negizde úı-jaı beredi.
"Osyǵan oraı "QR Prezıdenttigine kandıdattaryna úgittik baspa materıaldaryn ornalastyrýǵa oryndar belgileý jáne saılaýshylarmen kezdesý úshin úı-jaılar berý týraly" Astana qalasy ákimdiginiń 2015 jylǵy 10 naýryzdaǵy №06346 qaýlysyna ózgerister engizilýde", - dedi ol.
Onyń dereginshe, elorda boıynsha kandıdattardyń úgittik baspa materıaldaryn ornalastyrýǵa arnalǵan 60 oryn bólinip, 15 úı-jaı usynylatyn bolady.
Sonymen qatar A.Ahmedjanov elordanyń 31 saılaý ýchaskesinde ózgertýler men tolyqtyrýlar engiziletindigin aıtty.
"Onyń ishinde №236 saılaý ýchaskesi ornalasqan 3660 áskerı bólim basqa oblysqa aýysyp, ýchaske jabyldy. 13 saılaý ýchaskesiniń ortalyqtary ózgerdi. Jańa kóppáterli turǵyn úı keshenderi men kósheler paıdalanýǵa berildi. Turǵyn úıler buzyldy. Sonymen qatar keıbir nysandarǵa jańa ataýlar berildi. Osyǵan oraı Astana qalasy boıynsha saılaý ýchaskeleriniń shekaralary týraly Astana qalasy ákiminiń 2018 jylǵy 13 jeltoqsandaǵy №0121 sheshimine ózgertýler men tolyqtyrýlar engizilmek", - dedi A.Ahmedjanov.
Qoǵamdyq keńes músheleri bul eki usynysty da qoldap daýys berdi.
Foto: ehonews.kz
