Saılaý-2019: «Aýyl» partııasy óz kandıdatyn jarııalaıdy

NUR-SULTAN. QazAqparat - 2019 jyldyń 25 sáýirinde Nur-Sultan qalasynda «Aýyl» halyqtyq-demokratııalyq partııasynyń kezekten tys XV sezi ótedi, dep habarlaıdy QazAqparat partııanyń baspasóz qyzmetine silteme jasap.

«Sezdiń kún tártibinde 2019 jylǵy 9 maýsymda ótetin Qazaqstan Respýblıkasy Prezıdentiniń kezekten tys saılaýyna partııa atynan kandıdatýra usyný máselesi tur. Jıynǵa partııanyń oblystyq fılıaldarynyń ókilderi, jastar qanatynyń músheleri, partııalyq belsendiler men buqaralyq aqparat quraldarynyń ókilderi qatysady», - delingen partııa habarlamasynda.

Eske sala ketsek, 9 sáýirde respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev elimizdiń Konstıtýtsııasyna sáıkes QR Prezıdentiniń kezekten tys saılaýyn 2019 jyldyń 9 maýsymynda ótkizý jóninde sheshimin jarııalady.

Aıta keteıik, 23 sáýir kúni «Nur Otan» partııasy atynan Qazaqstan Respýblıkasynyń Prezıdenttigine kandıdat retinde Qasym-Jomart Toqaev tirkeldi.

Keshe «Aq jol» demokratııalyq partııasynyń kezekten tys XV quryltaıy Danııa Espaevany resmı túrde prezıdenttikke úmitker retinde bekitti.

Odan bólek, «Uly dala qyrandary» respýblıkalyq qoǵamdyq birlestigi atynan qoǵam qaıratkeri, jazýshy-jýrnalıst Sádibek Túgel kandıdat retinde tıisti qujattaryn tapsyrdy.