Saılaý-2016: Halyqaralyq uıymdar men shet memleketterden taǵy 20 baıqaýshy tirkeldi
ASTANA. QazAqparat - Ortalyq saılaý komıssııasy 2016 jyldyń 20 naýryzyna taǵaıyndalǵan Qazaqstan Respýblıkasy Parlamenti Májilisiniń depýtattaryn saılaýǵa halyqaralyq uıymdar men shet memleketterden taǵy 20 baıqaýshyny akkredıttedi.
2016 jylǵy 1 naýryzda Ortalyq saılaý komıssııasy «2016 jylǵy 20 naýryzǵa taǵaıyndalǵan Qazaqstan Respýblıkasy Parlamenti Májilisi depýtattarynyń kezekten tys saılaýyna jáne máslıhattary depýtattarynyń kezekti saılaýyna halyqaralyq uıymdar men shet memleketter baıqaýshylaryn akkredıtteý týraly» qaýly qabyldady.
Atalǵan qaýlyǵa sáıkes Ortsaılaýkom QR Syrtqy ister mınıstrliginiń usynýy boıynsha eki halyqaralyq uıymnan jáne jeti shet memleketten 20 baıqaýshyny akkredıttedi.
«Olardyń ishinde: 2 baıqaýshy - TMD Mıssııasynan; 4 baıqaýshy - EQYU/DIAQB Mıssııasynan, 2 baıqaýshy - Armenııa Respýblıkasynan, 2 - Ázerbaıjan Respýblıkasynan, 2 - Grýzııadan; 2- - Latvııa Respýblıkasynan; 2 - Malaızııadan; 2 - Reseı Federatsııasynan jáne 2 baıqaýshy - Estonııa Respýblıkasynan», - dedi QR OSK múshesi Tatıana Ohlopkova.
Osylaısha, 2016 jylǵy 1 naýryzdaǵy jaǵdaı boıynsha Ortsaılaýkom eki halyqaralyq uıymnyń Mıssııalarynan (EQYU/DIAQB jáne TMD), bir halyqaralyq uıymnan (Islam yntymaqtastyǵy uıymy) jáne segiz shet memleketten 175 baıqaýshyny akkredıttedi.
Sondaı-aq Qazaqstan Respýblıkasy Syrtqy ister mınıstrligi 2016 jylǵy 29 aqpandaǵy jaǵdaı boıynsha 26 memleketten sheteldik buqaralyq aqparat quraldarynyń 112 ókilin akkredıttedi.
Shet memleketter men halyqaralyq uıymdardyń baıqaýshylaryn akkredıtteýdi Ortsaılaýkom 2016 jylǵy 14 naýryzǵa deıin júzege asyrady.
