SAILAÝ-2015: T.Syzdyqov EQYU/DIAQB mıssııasynyń basshysy K.Ionkermen kezdesti
ASTANA. QazAqparat - Astana qalasynda QR Prezıdenttigine kandıdat T.Syzdyqov pen Respýblıkalyq saılaýaldy shtabtyń jetekshisi A.Qońyrov QR kezekten tys prezıdent saılaýyn baqylaý jónindegi EQYU/DIAQB mıssııasynyń basshysy Kornelııa Ionkermen kezdesti.
Kezdesý barysynda saılaý komıssııalarynyń QR Prezıdenttigine kandıdattyń nasıhatshylary men shtabynyń jumysyn, olardyń halyqaralyq standarttar men ulttyq zańdylyqtarǵa sáıkestigin baǵalaý salasyndaǵy saılaýaldy shtab pen mıssııanyń yntyqmaqtastyǵy máseleleri talqylandy.
Mıssııanyń negizgi mindeti saılaý protsesin baqylaý jáne saılaý qorytyndylaryna sáıkes baıandama jasaý dep atap ótti Ionker hanym.
T.Syzdyqov jáne A.Qońyrov QKHP-niń prezıdenttik jáne parlamenttik saılaý naýqandaryna qatysýda mol tájirbıelerge ıe ekendigin jetkizdi. Partııa barlyq qajetti resýrstarmen qamtylǵan, sonymen qatar Qazaqstannyń barlyq aımaqtarynda kóptegen nasıhatshylary men baqylaýshylary bar.
«Jergilikti jerlerdegi saılaý komıssııalary kásibı jáne shapshań jumystanýda, - dep atap ótti Syzdyqov. - Sonymen qatar jergilikti ókildikterde biz óz mindetimizdi muqııat atqardyq, ár qol qoıylǵan tizim jiti tekserildi».
QR Prezıdenttigine kandıdat T.Syzdyqovtyń saılaýaldy shtabynyń basty qyzmeti saılaý zańyn ashyq jáne ádil ustaný ekendigi atap ótildi.
Kezdesý sońynda, qos tarap demokratııalyq saılaýlardyń basty ustanymy teń quqyly kúres arqyly ádil saılaý ótkizý degen ortaq pikirge keldi.
