SAILAÝ -2015: Seniń daýysyń - Seniń bolashaǵyń!» posterler baıqaýyna 600-ge jýyq jumys jiberildi
ASTANA. QazAqparat - «Seniń daýysyń - Seniń bolashaǵyń!» atty baıqaýǵa kelip túsken jumystardyń kórmesi ótedi.
Bul týraly búgin Ortalyq kommýnıkatsııalar qyzmetindegi brıfıngte «Qalamger - Azamat» jas jýrnalıster qoǵamdyq qorynyń tóraǵasy Aıdar Qyryqpaı málim etti.
«Meniń oıymsha, kezekten tys prezıdenttik saılaý árbir qazaqstandyq úshin úlken mereke bolýy kerek. Óıtkeni, biz ózimizdiń bolashaǵymyz úshin daýys beremiz. Osy turǵyda jastardy, barsha qazaqstandyqtardy ózderiniń azamattyq kózqarasyn bildirý maqsatynda, qyzyqtyrý baǵytynda «Seniń daýysyń - Seniń bolashaǵyń!» atty baıqaýdy uıymdastyrýdy jón kórdik»,-dedi ol.
Aıta keteıik, baıqaý 17 naýryzda jarııalandy. Osy kúnge deıin bul sharaǵa oraı 600-ge jýyq jumys usynylǵan eken.
«Kún saıyn qatysýǵa nıettilerdiń sany artyp keledi. Jumystardy usynǵan jastardyń kózqarastary óte myqty, elimizdiń sımvoldaryna, qundylyqtaryna baılanysty óte jaqsy posterler salyp jatyr»,-dedi A. Qyryqpaı.
Belgili bolǵandaı, avtorlardyń kópshiligi 18-29 jas aralyǵyndaǵylar. Baıqaýdyń eń jas qatysýshysy retinde Qazaq ulttyq óner ýnıversıtetiniń janyndaǵy mekteptiń oqýshysy 14 jasar Shuǵyla Mahambet tirkeldi.
Baıqaýǵa jumystardy qabyldaý 15 sáýirde aıaqtalady. Úzdik shyqqan jumystardy qazylar alqasy iriktep, Almatyda 20 sáýirde saltanatty túrde marapattaý rásimi ótedi. «Baıqaýdyń maqsaty - ózindik sheberligimen kózge túsken jastardy halyqqa tanytý. Osy oraıda baıqaý qorytyndysy shyqqannan keıin kelesi kúni Almatyda usynylǵan jumystardyń barlyǵyn kórmede kópshilik nazaryna usynýdy josparlap otyrmyz»,-dedi ol.
Bul baıqaý «Sailau2015.el.kz» arnaıy tuǵyrnamasy aıasynda «El.kz» áleýmettik jelisiniń bazasynda ótip jatyr. Qazirgi kezde posterlerdiń basym bóligi Almaty, Aqmola jáne Batys Qazaqstan oblystarynan kelip tústi.
