Saılaý-2015: Saılaýlardy baqylaý jónindegi Respýblıkalyq qoǵamdyq Komıssııanyń jumysyna oń baǵa beremin - J. Súleev
ALMATY. QazAqparat- Belgili web-baspager jáne jýrnalıst Jánibek Súleev QazAqparat tilshisine saılaýlardy baqylaý jónindegi Respýblıkalyq qoǵamdyq Komıssııanyń jumysyna qatysty pikirin bildirdi.
«Nurlan Erimbetov basqaratyn atalǵan Komıssııanyń jumysyna oń baǵa beremin. Olar búkil bir, naǵyz bilikti baqylaýshylar tobyn daıarlady. Árıne, olarǵa úlken jaýapkershilik júkteledi. Óıtkeni, kez-kelgen saılaý nýqany, qansha jerden tııanaqty uıymdastyrylsa da qandaı da bir qaıshylyqtarsyz ótpeıdi. Al aǵymdaǵy saılaý naýqanynyń bir ereksheligi sol, munda zań buzýshylyqtardyń oryn alýyna eshkim de múddeli emes. Óıtkeni, odan kelip keter paıda joq», - dedi J. Súleev. Onyń aıtýynsha, qoǵamdyq Komıssııa zań buzýshylyqtardy tirkeý úshin emes, olardy boldyrmaý maqsatynda qurylǵan. «Komıssııa jasandy zań buzýshylyq áreketter oılastyryp, sonyń negizinde saıası arandatýshylyq jasaǵysy keletinder bolsa, olardyń jolyn kesedi degen úmittemin», - dedi jýrnalıst.
