SAILAÝ-2015: Prezıdenttikke kandıdat Á.Qusaıynovtyń ShQO jáne Qostanaı oblystaryndaǵy aımaqtyq shtabtary belsendi jumys jasaýda
ASTANA. QazAqparat - Qazaqstan Respýblıkasy prezıdenttigine kandıdat Ábilǵazy Qusaıynovtyń Shyǵys Qazaqstan jáne Qostanaı oblystaryndaǵy aımaqtyq shtabtary, senimdi tulǵalary onyń saılaýaldy tuǵyrnamasy týraly túsindirip, úgit-nasıhat materıaldaryn úlestirýde.
Shyǵys Qazaqstan oblysynda úgit-nasıhat materıaldaryn ilýge arnalǵan 33 núktege 4 myń únparaq ornalastyrý kózdelgen.
Prezıdenttikke úmitker Á.Qusaıynovtyń Shyǵys Qazaqstan oblysyndaǵy aımaqtyq saılaýaldy shtabynyń jetekshisi Nazgúl Ahmetqalıeva: «Shtab qyzmetkerleri aqparattyq-nasıhattyq materıaldardy arnaıy belgilengen jerlerge ilýde. Ondaı oryndar barlyq qalalarda, aýdan jáne aýyldyq okrýgterde bar. Ornalastyryp, apta saıyn tekserip otyrady. Sondaı-aq olar jergilikti halyqpen kezdesýler uıymdastyrady. «Úıden úıge» degen jaqsy aktsııa bar. Kandıdatymyzdyń saılaýaldy baǵdarlamasyn úıdi-úıge baryp túsindiremiz», - dedi.
QR Prezıdenttigine kandıdat Á.Qusaıynovtyń Óskemen qalasyndaǵy senimdi tulǵasy Marına Tarasenko qala jurtshylyǵy saılaý naýqanyna qatysty azamattyq belsendilik tanytyp otyrǵanyn atap ótti.
Qostanaı oblysynda aımaqtyń 30-ǵa jýyq belsendi azamaty kún saıyn úgit-nasıhat jumystaryn júrgizýde. Olar jergilikti halyqqa ekologııalyq qaýipsizdik pen qorshaǵan ortany qorǵaý qaǵıdalaryna negizdelgen kandıdattyń saılaýaldy tuǵyrnamasynyń negizgi baǵyttaryn túsindirýmen aınalysady.
QR Prezıdenttigine kandıdat Á.Qusaıynovtyń Qostanaı oblysyndaǵy saılaýaldy shtabynyń jetekshisi Baýyrjan Tıbeevtiń aıtýynsha, úgit jumystary tek oblys ortalyǵyn ǵana emes, sondaı-aq aýdan ortalyqtaryn da qamtyp otyr.
Sáıkesinshe, ár aýdan ortalyǵynda osy jumystardy júrgizetin senimdi tulǵalar bar. Úgit naýqany zańǵa sáıkes júrgizilýde. Onyń ishinde túrli baspa ónimderin: plakattar men broshıýralardy taratý qarastyrylǵan.
