SAILAÝ-2015: Prezıdenttikke kandıdat Á.Qusaıynovtyń BQO jáne Qyzylorda oblystaryndaǵy saılaýaldy shtabtarynyń mindetteri aıqyndaldy
ASTANA. QazAqparat - Prezıdenttikke kandıdat Ábilǵazy Qusaıynovtyń aımaqtyq shtabtary saılaýshylarmen belsendi jumys júrgizýde.
Kandıdattyń Batys Qazaqstan jáne Qyzylorda oblystaryndaǵy saılaýaldy shtabtarynyń saılaý naýqany boıynsha mindetteri aıqyndaldy.
Úgit-nasıhat jumystary qyzý júrip jatyr. Baǵdarlamasy «jasyl vektor» negizine súıengen Ábilǵazy Qusaıynovtyń senimdi tulǵalary nasıhat materıaldaryn taratyp, únparaqtardy kóshelerge ilýde.
Batys Qazaqstan oblysyndaǵy shtab óz jumysyn 16 naýryzda bastady. 16 senimdi tulǵanyń 4-eýi úgit jumystaryn Oral qalasynda, al qalǵandary aýdandar boıynsha júrgizip jatyr. Kandıdatty qoldaý úshin mundaǵylar 7 myń qol jınap berdi. Shtattaǵylar negizgi elektoraty ónerkásiptegiler men bıznesmender dep sanaıdy.
QR Prezıdenttigine kandıdat Ábilǵazy Qusaıynovtyń Batys Qazaqstan oblysyndaǵy shtabynyń jetekshisi Aıdos Sebepovtyń aıtýynsha, shtab qyzmetkerleri úgit-nasıhat naýqanyna 26 naýryzdan bastap kirisken.
«Arnaıy materıaldar ázirlep, qalalarǵa tarattyq. Úgit-nasıhat jumystary barlyq aýdandarda júrip jatyr. Úgit materıaldary qyzmetkerlerge jóneltilip, olar ony jergilikti turǵyndarǵa túsindirip, kezdesýler uıymdastyrýda», - deıdi ol.
Qyzylorda oblysyndaǵy shtab qyzmetkerleri óz jumystaryna eshqandaı kedergi joq ekenin aıtady. Bári josparǵa saı, qarjylyq jáne ýaqyttyq shekteýsiz júrip jatyr.
Tek Qyzylorda oblysyndaǵy shtabtyń ózinde 11 senimdi tulǵa belsendi jumys atqaryp jatyr. Ábilǵazy Qusaıynovtyń saılaýaldy tuǵyrnamasyn túsindirýden bólek, shtab qyzmetkerleri kandıdattyń bılbordtarynyń barlyq jerde ornalastyrylǵanyn jiti baqylaýda ustaıdy.
Qyzylorda oblysyndaǵy shtab jetekshisi Jandos Tusmaǵambetovtiń aıtýynsha, oblystyq shtabtyń quramynda 11 senimdi tulǵa bar. Olar óz jumystaryn bekitilgen zańǵa, ereje men talaptarǵa sáıkes oryndaýda.
