SAILAÝ-2015: Ortalyq saılaý komıssııasynyń Úndeýi

Konstıtýtsııaǵa jáne saılaý zańnamasyna sáıkes on segiz jasqa tolǵan ár azamattyń saılaýda daýys berý quqyǵy bar.

Saılaýshynyń bul quqyǵyn iske asyra alýy úshin ákimdikter saılaýshylar tizimderin jasaıdy jáne málimetterdiń rastyǵy men tolyqtyǵyna jaýapty bolady.

Azamatty naqtyly saılaý ýchaskesindegi saılaýshylar tizimine engizý úshin onyń osy saılaý ýchaskesiniń aýmaǵynda turatyn jeri boıynsha tirkelý faktisi negiz bolyp tabylady.

5 sáýirde saılaý týraly zańǵa sáıkes ákimdikter tıisti ýchaskelik saılaý komıssııalaryna akt boıynsha saılaýshylardyń jańartylǵan tizimderin tapsyrdy.

Ákimdikterdiń, saılaý komıssııalary men múddeli memlekettik organdardyń saılaýshylar tizimderin naqtylaý boıynsha birlesip júrgizgen jumysynyń nátıjesinde belsendi saılaý quqyǵyna ıe azamattardyń jalpy sany 2015 jylǵy 1 qańtardaǵy derektermen salystyrǵanda 213 myń adamǵa artty.

10 sáýirden bastap saılaýshylardyń jańartylǵan tizimderi ýchaskelik saılaý komıssııalarynyń úı-jaılarynda tanysý úshin usynylady jáne árbir saılaýshy ózi týraly derekterdi tikeleı saılaý ýchaskelerinde daýys berý kúnine deıin jáne saılaý kúni teksere alady.

Ol úshin ýchaskelik saılaý komıssııasyna jeke basyn kýálandyratyn, sondaı-aq turǵylyqty jerinde tirkelgenin rastaıtyn qujattarmen (mekenjaı anyqtamasy nemese azamattardy tirkeý kitaby) kelip, saılaýshylar tizimimen muqııat tanysý qajet.

Mekenjaı anyqtamasyn saılaýshy halyqqa qyzmet kórsetý ortalyǵynda (HQO), «elektrondyq úkimet» portalynda (elektrondyq-sandyq qoltańbasy - ESQ-sy bolǵan jaǵdaıda) nemese HQO-da ornalasqan QQP-termınaldan JSN arqyly ala alady.

Saılaýshynyń tegi tizimde bolmaǵan nemese ózi týraly derekterde dálsizdikter jiberilgen jaǵdaıda, saılaýshy kórsetilgen qujattar negizinde ózin tizimge kirgizýdi nemese qajetti túzetýler engizýdi talap ete alady.

Múmkindikteri shekteýli adamdardyń saılaý ýchaskelerine qoljetimdiligin qamtamasyz etý maqsatynda QR OSK olardyń kedergisiz jáne qaýipsiz kirip-shyǵýy úshin saılaý ýchaskelerin múmkindiginshe quraldarmen (arnaıy pandýstar, tutqalar jáne t.b.) jabdyqtaý týraly ótinishpen ákimdikterge júgindi.

Saılaýshylar týraly aqparatty naqtylaý úshin respýblıkanyń árbir aýdany men qalasynda mamandandyrylǵan Call-ortalyq quryldy. El boıynsha olardyń sany 441. Óziniń aýdanyndaǵy nemese qalasyndaǵy Call-ortalyǵyna telefon shalyp, saılaýshy sondaı-aq óziniń saılaýshylar tizimine engizilgeni, qaı saılaý ýchaskesinde tirkelgeni týraly málimetterdi bilip, sonymen qatar ózi týraly derekterdi teksere alady. Call-ortalyqtarynyń telefondary týraly aqparat jergilikti buqaralyq aqparat quraldarynda jarııalanady.

Demalys úılerinde, sanatorıılerde, turaqty emdeý-profılaktıkalyq mekemelerinde, shalǵaıdaǵy jáne qatynasý qıyn aýdandarda ornalasqan azamattar turatyn mekenderde, alys mal sharýashylyǵy ýchaskelerinde, tergeý ızolıatorlary men ýaqytsha ustaý ızolıatorlarynda, Qazaqstan Respýblıkasyna qaraıtyn jáne daýys beretin kúni júzýde júrgen kemelerde qurylǵan saılaý ýchaskeleri boıynsha daýys berýdi ótkizetin kúni atalǵan mekemeler men uıymdarda nemese keme bortynda bolatyn azamattar engiziledi.

Áskerı bólimder boıynsha olarda turatyn áskerı qyzmetshilerdiń barlyǵy, sondaı-aq olardyń otbasy músheleri jáne ásker bólimderi ornalasqan jerlerde turatyn basqa da saılaýshylar engiziledi. Áskerı bólimderden tys jerlerde turatyn áskerı qyzmetshiler saılaýshylar tizimine turǵylyqty jeri boıynsha jalpy negizde engiziledi.

Shet memleketterdegi Qazaqstan Respýblıkasynyń ókildikteri janyndaǵy saılaý ýchaskeleri boıynsha tıisti shet memlekette turatyn nemese uzaq merzimdi sheteldik issaparda júrgen ári Respýblıkanyń jaramdy pasporty bar barlyq azamattar engiziledi.

Shet memleketterge jeke shaqyrý boıynsha, qyzmettik, iskerlik jáne týrıstik saparǵa kelgen azamattar ýchaskelik saılaý komıssııasyna ótinish jasaǵan jaǵdaıda jáne olardyń Qazaqstan Respýblıkasynyń azamaty degen jaramdy pasporty bolsa, sondaı-aq saılaýshylar tizimine engizilýi tıis.

Jataqhanalarda turatyn, kúndizgi bólimde oqıtyn stýdentter men aspıranttar jataqhananyń turǵan jeri boıynsha saılaýshylar tizimine engiziledi, al jataqhanada turmaıtyndar HQO-ǵa júginip, jataqhananyń nemese JOO-nyń ornalasqan mekenjaıy boıynsha ýaqytsha tirkele alady. Budan keıin olar sondaı-aq jataqhananyń nemese JOO-nyń ornalasqan jeri boıynsha saılaýshylar tizimine engiziledi.

Elimizdiń zańnamasy óz mekeninen tys jerlerde bolatyn saılaýshylarǵa respýblıka kóleminde kez kelgen ýchaskede daýys berýge quqyq berý múmkindigin qarastyrǵan.

Búgin 10 sáýirden bastap 25 sáýir kúngi saǵat keshki 18.00-ge deıin saılaýshy tirkelgen jeri boıynsha ýchaskelik saılaý komıssııasynda jazbasha ótinishi men jeke kýáligin usynyp, esepten shyǵarý kýáligin ala alady.

Tirkelgeninen basqa eldi mekende turyp jatqan, óz ýchaskesine kelip esepten shyǵarý kýáligin alatyn múmkindigi joq saılaýshylar ózi senim bildiretin tulǵaǵa notarıat rastaǵan senimhatynyń negizinde esepten shyǵarý kýáligin aldyrýǵa quqyly.

Bul rette bir eldi mekenniń sheginde esepten shyǵarý kýálikteri berilmeıtinin este saqtaý mańyzdy.

Daýys berý kúni esepten shyǵarý kýáligi men saılaýshynyń jeke basyn kýálandyratyn qujatty usynǵan jaǵdaıda ýchaskelik saılaý komıssııasy ony barǵan jeri boıynsha saılaýshylar tizimine engizedi.

Qazaqstan Respýblıkasy Ortalyq saılaý komıssııasy azamattardy belsendi bolýǵa jáne ózi týraly derekterdi saılaýshylar tizimderinen ýaqtyly tekserýge shaqyrady.