SAILAÝ-2015: QR Prezıdenttigine kandıdat Ábilǵazy Qusaıynov atyraýlyqtarmen kezdesti
ASTANA. QazAqparat - QR Prezıdenttigine kandıdat Ábilǵazy Qusaıynov Atyraý qalasynyń jurtshylyǵymen kezdesti. Jurtshylyqpen kezdesý barysynda Ábilǵazy Qusaıynov jıyn qatysýshylaryn ekologııanyń qazirgi problemalaryn qozǵaıtyn saılaýaldy tuǵyrnamasynyń negizgi baǵyttarymen tanystyrdy.
Á.Qusaıynov atap ótkendeı, búginde ekologııa ǵylymyna bıologııanyń bir salasy dep qaramaı, oǵan áldeqaıda tereńnen boılaý qajet. Ekologııa adam men qorshaǵan ortanyń qarym-qatynasyn zertteıtin pánaralyq ǵylymǵa aınalýy tıis.
«Jer júzinde adam paıda bolyp, onyń órkenıeti ósken saıyn, bıosfera evolıýtsııasynda jańa - antropogendik faktor iske qosyldy. Adam bıosferany jeke qajettilikterin qanaǵattandyrý úshin paıdalana bastady. Alaıda, qorshaǵan ortany qanshalyqty ózgertýge tyrysqanymyzben, Jer betindegi tirshilik tabıǵattyń qatań zańyna baǵynyp damıdy. Sondyqtan, adamzat órkenıeti turaqty damý úshin osy zańdar men qaǵıdalardan aýytqymaýy kerek. Tabıǵatpen úılesimdi ómir súrý - adamnyń Jer betindegi ómir saltynyń negizgi qaǵıdasy», - dep atap ótti Ábilǵazy Qusaıynov. Onyń aıtýynsha, ǵylym, tehnıka men tehnologııanyń sapaly jańa baılanysyn qalyptastyrǵan HH ǵasyr qoǵamnyń tabıǵatqa áser etý kúshin arttyryp, adamzatqa birqatar ózekti ári ótkir mindetter júktedi. Sol sebepti, Á.Qusaıynovtyń pikirinshe, tabıǵat qoınaýyn tıimdi ári josparly paıdalaný, qorshaǵan ortany lastanýdan qorǵaý, memlekettik baqylaýdyń josparly júıesin engizý ár azamattyń basty mindetine aınalýy tıis. Á.Qusaıynovtyń saılaýaldy tuǵyrnamasynyń taǵy bir mańyzdy baǵyty - ónerkásiptik qaýipsizdik máseleleri. Kandıdattyń aıtýynsha, ónerkásiptik qaýipsizdik degenimiz - ónim men óndiristiń qaýipsizdigi týraly, kóp deńgeıli standarttaý men sertıfıkattaý týraly tehnıkalyq reglamentterdi, normalardy qatań ustaný. «Meniń maqsatym - osy normalardyń ashyq jáne durys oryndalýyna qol jetkizý. Qaýipti óndirispen aınalysatyn barlyq uıymdar óz jumysshylarynyń, nysandary men qorshaǵan ortanyń qaýipsizdigine jaýapty boly kerek. Barlyq kásiporyndar óz jumystaryn qorshaǵan ortaǵa yqpaly meıilinshe az bolatyndaı etip júrgizýleri kerek», - dep qorytty Ábilǵazy Qusaıynov. Sonymen qatar, qala jurtshylyǵy aldynda aımaqtyq shtab jetekshisi Sadyrjan Jekenov sóz sóıledi. S.Jekenov ekologııalyq túıtkilderdiń ózektiligine toqtalyp, ekologııalyq problemalardy der kezinde sheshý qajettigin atap ótti. «Biz týyndaǵan ekologııalyq syn-qaterlerge der kezinde toıtarys berip, qorshaǵan ortanyń lastanýy, sý men topyraqtyń qunarsyzdanýy syndy máselelerdi tez arada sheshýimiz kerek. Eń bastysy, bul problemalardyń týyndaýyna jol bermeý mańyzdy. Bul jerde azamattardyń ózi de sanaly túrde túsinistik tanytýlary qajet. Sonymen qatar, ekologııalyq-aǵartýshylyq qyzmetke de erekshe nazar bólgen jón. Biz ekologııa týraly bilimdi, qaýipsiz ári ekologılyq taza ortada ómir súrý qaǵıdalaryn, tabıǵat pen adamzatty qorshaǵan aınala týraly bilimdi qoǵam sanasyna sińire bilýimiz kerek», - dep atap ótti S.Jekenov.
