SAILAÝ-2015: QR Prezıdenttigine kandıdat Á.Qusaıynov elordada «Turan-Astana» stýdentteri jáne ustazdarymen kezdesti

Kezdesý barysynda Ábilǵazy Qusaıynov jıyn qatysýshylaryn ekologııanyń qazirgi problemalaryn qozǵaıtyn saılaýaldy tuǵyrnamasynyń negizgi baǵyttarymen tanystyrdy.

Á.Qusaıynov jıylǵan jurtqa tirshiliktiń «jasyl» vektorynyń ǵylymı negizdemesi týraly, onyń ishinde qoǵamdy kezeń-kezeńmen ekologııalandyrýdyń qandaı kúrdeli ári ózekti mindet bolyp tabylatyny týraly áńgimelep berdi. Bul - damýdyń aldaǵy josparyn muqııat zertteý arqyly ǵana qol jetkizýge bolatyn jahandyq maqsat.

Kandıdattyń aıtýynsha, álemdik ekologııalyq máselelerge tıisti deńgeıde nazar bólinbeýi onyń mańyzdylyǵyn túsinýge kedergi bolyp otyr.

«Ekologııa - adamzat tirshiliginiń mańyzdy faktory. Bizdiń aınalamyzdaǵynyń bári - tabıǵat, bizdiń ómir súrip jatqan ortaq álemimiz. Tehnologııa ilgeri damyǵan saıyn, «jasyl» orta osaldanyp barady.

Búginde, bir adamdy azyq-túlikpen qamtamasyz etýge qajetti jerdiń kólemi, álem boıynsha, 21,9 gektarǵa teń. Al Jer sharynyń bıologııalyq múmkindigi 15,7 gektardy ǵana quraıdy. ıAǵnı, ózderińiz baıqaǵandaı, Jerdi mekendeıtin 7 mıllıard adamnyń árbireýin taza, lastanbaǵan, qunarly jermen qamtý úshin kem degende 6,2 gektar jetispeıdi. Bul óte kúrdeli másele», - dedi Á.Qusaıynov.

Kezdesý barysynda kandıdat, sondaı-aq, álem boıynsha biregeı tabıǵı keńistikterdiń kúrt azaıyp bara jatqanyn sóz etti. Mysalǵa, Jer sharyndaǵy halqy kóp aımaqtarda jahandyq ekojúıeniń mańyzdy bólshegi - batpaqty jerlerdiń 90 paıyzy múlde joıylǵan.

«Ekologııa - bizdiń ortaq úıimiz, ǵalamsharymyz týraly ǵylym. Ǵalamsharymyz jalǵyz, sondyqtan ony kózimizdiń qarashyǵyndaı saqtaýymyz kerek. Bul týraly mektep qabyrǵasynan beri aıtylyp keledi, biraq naqty iske kelgende máseleniń ózektiligi joıylar emes.

Mysalǵa, jahandyq jylyný problemasyn alaıyq. 20 ǵasyrdan beri ortasha aýa temperatýrasy 0,74 gradýsqa ósti. Munyń úshten eki bóligi sońǵy otyz jylǵa tıesili. Turaqty temperatýralyq kórsetkish ǵasyrlar boıy saqtalyp kelgen tabıǵat úshin bul úlken ózgeris», - dedi Ábilǵazy Qusaıynov.

Kandıdattyń keltirgen málimeti boıynsha, 19 ǵasyrdyń sońynan beri árbir jańa onjyldyq aldyńǵysyna qaraǵanda jylyraq. Bul ǵylymı qaýymdastyqtar moıyndap otyrǵan jalpyǵa aıan aqparat, biraq halyqaralyq deńgeıde oǵan tıisti jaýap tabylmaı otyrǵany ókintedi deıdi ol.

Kóptegen elderde jasyl tehnologııa óndiriske engizilmeı keledi, tipti, ony jatyrqap otyrǵandar qanshama. Tabıǵı resýrstar keshenin biriktiretin ortaq termın - ekologııany kúızeliske ushyratqan mundaı kúrdeli jaǵdaı amalsyz erteńgi kúniń jaıly alańdatady.

Stýdenttermen jáne ustazdarmen kezdesý kezinde kandıdattyń saılaýaldy shtabynyń jetekshisi Rústem Jolaman da ekologııalyq taqyryptyń ózektiligine toqtaldy.

«Bizdiń zamanymyzda ekologııa - shekteýli tirshilik kózi. Negizinen, onyń shekteýli ekeni buǵan deıin de belgili bolatyn, biraq, sheksiz kóringen shıkizat qorynyń taıazdanýy kún tártibindegi kúrdeli máselege aınaldy.

Sondyqtan da biz halyqty ekologııa ǵylymdarynyń negizgi baǵyttarymen tanystyryp, atalmysh máselege muqııat kóńil bólýge shaqyramyz. Jasyl vektor únemi taza aýa, qunarly jer, aýyzsý kózderi men Jer sharynyń atmosferasy syndy eń mańyzdy tabıǵat qorlarynyń tapshylyǵy týraly ózekti máselelerdi meńzeıdi», - dedi R.Jolaman.

Kezdesý sońynda Ábilǵazy Qusaıynov ekologııalyq kún tártibiniń ózektiligine taǵy bir toqtalyp, qala jurtshylyǵyn jahandyq ekologııalyq máselelerge kóńil bólýge shaqyrdy.

«Tabıǵat - adamzattyń basty baılyǵy. Ony qasterlep, kútip ustaý kerek, ol - ár adamnyń, árqaısymyzdyń basty mindetimiz», - dep qorytty óz sózin Á.Qusaıynov.