SAILAÝ-2015: Kandıdat T.Syzdyqov Astana qalasyndaǵy Qazaq drama teatrynda saılaýshylarmen kezdesti
ASTANA. QazAqparat - Búgin Qazaqstan Kommýnıstik halyq partııasy atynan Qazaqstan Respýblıkasy Prezıdenttigine kandıdat T.Syzdyqov Astana qalasynda Qazaq drama teatrynda saılaýshylarmen kezdesý ótkizdi.
Kandıdat Turǵyn Syzdyqovtyń jumyskerlermen kezdesýindegi basty taqyryp jalpy adamzattyq qundylyqtarǵa arnalǵan.
T.Syzdyqov aıtqandaı, búgin adamı qundylyqtar qatarynda birinshi kezekte halyqtardyń beıbit ómir súrýi men ınternatsıonalızm bolyp tabylady. Olar beıbitshilik pen órkendeýdiń kepili. Álem halyqtary turaqtylyq pen órkendeýdi saqtaýdyń mańyzyn túsinedi, ol úshin shydamdylyq pen tózimdilik ıdeıalaryn alǵa tartý qajet. Jer betindegi beıbitshilikke qol jetkizýdiń sharty - barlyq memleketterdiń beıbit yntymaqtastyǵy ekendigi daý týdyrmaıdy.
Qazir biz beıbit ómir súrýdemiz, ol birinshi kezekte bizdiń tarıhı qonaqjaılyǵymyzben, meıirbandyǵymyz jáne izgiligimizben baılanysty. Bul bizdiń dástúrlerimiz. «Qazirgi formatsııadaǵy marksızm-lenınızm bizdiń partııanyń negizi bolyp tabylady. Marksızmniń ǵylymı negizdelgen ıdeıalary óziniń ózektiligin joǵaltqan joq jáne biz olardy alǵa tartý baǵytyndaǵy qyzmetti jalǵastyramyz», - dedi kandıdat.
«Batys qoǵamy shynaıy jáne jalǵan qundylyqtardyń kúresi, ónegelik dástúrler men adamgershilik qaǵıdalarynyń devalvatsııalanýy jaǵdaıynda ómir súrip keledi.Osyndaı úrdister áleýmettik damýda aýyr zardaptarǵa soqtyrady», - dep T.Syzdyqov oıymen bólisti.
T.Syzdyqovtyń pikirinshe, batystyq minez-qulyq adamgershilik, janyndaǵylarǵa kómek kórsetý jáne meıirbandyq qasıetterinen arylǵan aqylsyz azamattardy tárbıeleıdi. Mysalǵa, osyndaı otbasylarda birtindep otbasylyq-týystyq qatynastar joıylyp, rýlyq dástúrlerdiń mırastyǵy úziledi. «Jańa urpaqqa ómir bergen ata-analardy qurmetteý qasıeti de jat bolyp ketti. Tereń ındıvıdýalızm men áleýmettik jalǵyzdyqqa umtylys batys qoǵamy ókilderine jastaıynan tárbıelenedi. Kámelet jasyna jetkennen keıin batys jastary ata-anasynyń úıinen ketip, jeke ómirin uıymdastyrý qamyn shegedi. Osylaısha, urpaqtardyń bir-birimen baılanystary úzilip, rýhanı-adamgershilik vakýým paıda bolǵan.
Batys qoǵamynda sáttilik teorııasy beker engizilmegen. Barlyq is-qımyldar kez-kelgen ádister arqyly sáttilikke jetýge ıtermeleıdi. Jeńilistiń barlyǵy orny toltyrylmaıtyn zııan retinde eseptelip, adamdy bir satyǵa tómendetedi. Osyndaı qoǵamda rýhanı-adamgershilik qundylyqtary shette qalady, olar qajet emes», - dedi ol.
Kezdesý sońynda prezıdenttikke kandıdat T.Syzdyqov qatysýshylardyń suraqtaryna jaýap berdi.
