Saılaý-2015: Daýys berýdiń joǵary belsendiligi túske qaraı baıqaldy
ASTANA. QazAqparat - Áleýmettik-saıası zertteýler ınstıtýty saılaý barysynyń monıtorıngin jarııalady. Osyǵan sáıkes, kezekten tys prezıdenttik saılaýda daýys berýdiń eń joǵary belsendiligi saǵat 11:00-den 12:00 kezinde baıqalǵany aıtyldy.
«Biz Ortalyq saılaý komıssııasy bergen málimetterdi jedel túrde baqylap otyrdyq. Bul jolǵy saılaýdyń ereksheligine toqtalatyn bolsam, biz naqty ýaqyt tártibinde daýys berý qarqynyn jáne onyń qalaı ótip jatqandyǵyn kórip otyrdyq. 16:00 kezinde OSK daýys berýdiń eń joǵary belsendiligi 11:00-den 12:00-ge deıin bolǵanyn málimdedi. Atap aıtqanda, bul úrdisti bizdiń de exit-pool derekterin esepteý kezinde baıqadyq»,-dedi atalǵan ınstıtýttyń dırektory Aıgúl Sádýaqasova elordadaǵy sarapshylyq forýmda.
Onyń sózine qaraǵanda, ınstıtýt tarapynan saılaý kúnin baıqaýǵa múmkindik bergen tórt márte baǵamdaý sharalary atqaryldy. Instıtýttyń suhbat alýshylary 8:00-den 10:00-ge deıingi saýalnamanyń birinshi tolqynynan málimetterdi usyndy. Ekinshi tolqyn - 10:15-ten 12:15-ke deıin, úshinshisi - 13:00-den 15:00-ge deıin, al tórtinshisi - 17:00-den 19:00-ge deıingi aralyqty qamtydy.
A. Sádýaqasovanyń aıtýynsha, túske deıin saýalnama aıasynda tańdap alynǵan adamdardyń 60 paıyzy suralsa, tús kezinde jáne odan keıingi ýaqytta qalǵan 40 paıyzy qamtyldy.
«Saýalnamada jalpy 40 myń respondet qurady. Oǵan Qazaqstannyń barlyq oblystary men Astana jáne Almaty qalalarynan jınalǵan málimetter engizildi. Jalpy elimiz boıynsha 160 saılaý ýchaskelerin qamtydyq. Aýyldyq saılaýshylar tańerteńnen, al Astana men Almaty qalalary túsken keıin belsendi qatysa bastady. Jalpy respýblıka boıynsha bizde 350 ıntervıýer jumys istedi»,-dedi ol.
