«Saılaý 2012: reıtıngter men boljamdar» atty dóńgelek ústelge qatysýshylardyń sarapshy qoǵamdastyqqa úndeýi qabyldandy
ASTANA. 7 jeltoqsan. QazAqparat. Búgin Astanada ótken «Saılaý 2012: reıtıngter men boljamdar» atty dóńgelek ústelge qatysýshylardyń sarapshy qoǵamdastyqqa úndeýi qabyldandy. QazAqparat úndeýdiń mátinin jarııalaıdy.
«Saılaý 2012: reıtıngter men boljamdar»
atty dóńgelek ústelge qatysýshylardyń
sarapshy qoǵamdastyqqa úndeýi
2012 jyldyń 15 qańtarynda Qazaqstanda Parlament Májilisi men máslıhattarynyń saılaýy ótedi. Bul saılaýdy qoldanystaǵy zańnama talaptaryn saqtaı otyryp, ashyq ta ádil básekelestikpen ótkizý - bul elimizdegi demokratııany odan ári nyǵaıtýdaǵy mańyzdy qadam bolyp tabylady.
Osyǵan baılanysty biz saılaý naýqanyna qandaı da bir dárejede qatysatyn sarapshy qoǵamdastyqqa úndeý joldaımyz.
1. Saılaý zańnamasynyń talaptaryn múltiksiz saqtaý.
«Saılaý týraly» QR Zańynyń 27-baby 9-tarmaǵy buqaralyq aqparat quraldarynda saılaýǵa baılanysty qoǵamdyq pikir saýaldamalarynyń nátıjelerin jarııalaý kezinde saqtalýy tıis normalar kózdelgeni belgili. Atap aıtqanda, saýaldama júrgizgen uıym, tapsyrys bergen jáne aqysyn tólegen adamdar, aqparat jınaý ádisi, suraqtyq naqty tujyrymdamasy, suraq berilgender sany men saýaldama nátıjeleriniń qatelik koeffıtsıenti mindetti túrde kórsetilýge tıis.
Buqaralyq aqparat quraldarynda qoǵamdyq pikir saýaldamasynyń nátıjelerin, saılaý nátıjeleriniń boljamdaryn, saılaýǵa qatysty ózge de zertteýlerdiń nátıjeleri týraly aqparatty saılaýǵa deıingi bes kúnniń ishinde jarııalaýǵa jol berilmeıdi.
Saılaý kúni daýys berýge arnalǵan úı-jaıda nemese saılaý pýnktinde qoǵamdyq pikirdi suraýǵa tyıym salynady.
2. Saılaý protsesin áleýmettanýlyq súıemeldeý ǵylymılyq, kásibı sheberlik jáne ashyqtyq prıntsıpteri negizinde júzege asyrylýy kerek. Tek sol kezde ǵana óz jumysymyzdyń nátıjelerine degen senim deńgeıin qamtamasyz ete alamyz.
3. Yntymaqtastyq, saılaý protsesiniń barlyq sýbektilerine degen ózara syılastyq pen senim atmosferasyn qurýǵa yqpal etý kerek. Saılaýǵa jumyldyrylǵan sarapshylar, áleýmettanýshylar, saıası tehnologtar birinshi kezekte saılaýshynyń quqyǵyn syılaýǵa tıis, ol ashyqtyq, obektıvtilik jáne aqparatqa qol jetimdilik jaǵdaıynda iske asyrylýǵa tıis.
Sarapshy qoǵamdastyqtyń joǵaryda atalǵan normalar men prıntsıpterdi saqtaýy ádil de ashyq saılaý ótkizýge, sondaı-aq olardyń nátıjeleriniń zańdylyǵyn qamtamasyz etýge jaǵdaı jasaıdy.
Astana qalasy, 2011 jylǵy 7 jeltoqsan
