SAILAÝ: 14 myń qazaqstandyq shetelde daýys beredi
ASTANA. QazAqparat - 14 myń qazaqstandyq shetelde daýys beredi. Bul týraly búgin QR Ortalyq saılaý komıssııasynyń múshesi Lázzat Súleımen málim etti.
20 naýryz kúni ótetin QR Parlamenti Májilisiniń kezekten tys jáne barlyq deńgeıdegi máslıhat saılaýlary 9840 saılaý ýchaskesinde ótetindigin atap ótken ol: «Daýys berý kúni Qazaqstannan tys jerde bolatyn azamattar sondaı-aq ózderiniń saılaýǵa qatysý quqyǵyn iske asyra alady. Ol úshin shet memleketterdegi Qazaqstan Respýblıkasy ókildikteriniń janynda Syrtqy ister mınıstrliginiń aýmaǵyndaǵy saılaý okrýgine qatysty saılaý ýchaskeleri qurylady», - dedi.
Onyń atap ótýinshe, saılaý zańnamasyna sáıkes shet memleketterdegi Qazaqstan Respýblıkasy ókildikteriniń janyndaǵy saılaý ýchaskeleri boıynsha saılaýshylar tizimderine tıisti shet memlekette turatyn nemese uzaq merzimdi issaparda júrgen jáne Respýblıka azamatynyń tólqujaty bar barlyq azamattar engiziledi. Sonymen qatar, elimizdiń shet memleketterde jeke shaqyrý boıynsha, qyzmettik, iskerlik jáne týrıstik saparlarda júrgen azamattary, olar ýchaskelik saılaý komıssııasyna júgingen jáne Qazaqstan Respýblıkasy azamatynyń tólqujaty bolǵan jaǵdaıda saılaýshylar tizimderine engiziledi.
«2016 jylǵy 4 naýryzdaǵy jaǵdaı boıynsha shet memleketterdegi konsýldyq esepke Qazaqstan Respýblıkasynyń 14 myńnan astam azamaty tirkelgen. 51 shet memlekettegi Qazaqstan Respýblıkasy ókildikteriniń janynda 65 saılaý ýchaskesi quryldy. 25 ýchaske Azııa elderinde, 4-eýi - Ońtústik jáne Soltústik Amerıkada, 1-eýi - Afrıkada, 20-sy - Eýropada, 15-si - TMD-da», - dedi L.Súleımen.
Aıta keterligi, sheteldik ýchaskelerde Qazaqstan Respýblıkasynyń azamattary partııalyq tizimder boıynsha saılanatyn Parlament Májilisiniń depýtattaryn saılaýda ǵana daýys bere alady.
