Saılanǵan aýyl ákimderiniń kásibı biliktiligin arttyratyn baǵdarlama ázirledik – Erlan Ábil
NUR-SULTAN. QazAqparat – Bıyl elimizde aýyl ákimderiniń saılaýy ótetini belgili. Osy oraıda saılanǵan aýyl ákimderiniń jeke jáne kásibı biliktiligin arttyrýǵa baǵyttalǵan arnaıy baǵdarlama ázirlendi. Bul týraly QR Prezıdenti janyndaǵy Memlekettik basqarý akademııasynyń rektory Erlan Ábil málim etti, dep habarlaıdy QazAqparat tilshisi.
«Aýyl ákimderin saılaý memlekettik damýdaǵy mańyzdy kezeńniń biri. Óıtkeni, aýyl halqy basshyny ózi tańdaıdy, olar eldimekenniń jaǵdaıy men ondaǵy máseleni sheshe alatyn azamattardy jaqsy biledi, osy oraıda halyqqa tańdaý quqyǵy berilip otyr. Onyń ústine bul úrdis Qazaqstanda alǵash ret qolǵa alynyp otyr. Ekinshiden, ortalyqtandyrylǵan memlekettik basqarý júıesimen ǵana jumys istemeı, sonymen qosa jergilikti atqarýshy organdardyń qyzmetine basymdyq beriledi. Ózderińiz biletindeı, Memleket basshysy usynǵan «Halyq únine qulaq asatyn memleket» qaǵıdaty bar, aýyl ákimderin saılaý sonyń jemisi desekte bolady. ıAǵnı halyq ákimdi saılaý arqyly óz únin bılikke jetkizip otyr», - dedi E. Ábil.
Onyń aıtýynsha, aýyl ákimderin saılaýdyń jaýapkershiligi zor jáne bastysy ol ashyq ári ádil ótýi tıis.
«Taǵy bir mańyzdy sát, aýyl ákimderin saılaýda jaýapkershilik Ortalyq saılaý komıssııasynyń emes jergilikti saılaý komıssııasynyń moınynda bolmaq. Ol degenimiz saılaýdyń ádil jáne ashyq túrde ótýi, onyń nátıjesiniń halyqtyń kóńilinen shyqqany abzal. Sonymen qatar saılaýda jeńgen aýyl ákimi halyqpen tyǵyz qarym-qatynasta jumys istep, olardyń muń-muqtajyn sheshýge táýeldi bolady, sebebi halyq oǵan úmit artyp, óz daýsyn berdi. Jáne aýyl halqy da óz máselelerin sheshýde saılaǵan ákimmen birlesip qyzmet etýge nıetti bolady. Jalpy ákim halyqqa jaqyn bolýy kerek. Sondaı-aq kóshbasshylyq qasıettiń bolýy da mindetti jáne kez kelgen máselege qatysty ońtaıly sheshim qabyldaı alýy tıis», - deıdi ol.
Odan bólek, akademııa basshysy aýyl ákimderine arnalǵan biliktilikti arttyrý baǵdarlamasynyń ázirlengenin aıtty.
«Biz óz tarapymyzdan aýyl ákimderine eldi basqarýda qoldaý kórsetýge qashanda daıynbyz. Qazirgi ýaqytta Ulttyq ekonomıka mınıstrligimen birlesip, saılanǵan aýyl ákimderin jeke jáne kásibı quzyrettilikke baýlıtyn arnaıy baǵdarlamanyń jobasyn ázirledik. Búginde ol kelisý ústinde, bekitilgen soń ákimge kerekti basty 2 quzyretti úıretetin bolamyz. Aldymen jeke bas quzyrettiligi. Ol degenimiz sóılesý, ózin-ózi ustaý jáne kóshbasshylyq qasıet. Ekinshi, kásibı quzyrettilik. Ákim bolǵannan soń ol memlekettik satyp alý, salyq saıasaty, bıýdjet kodeksin jiti meńgerýi kerek, mine osy oraıda biz oǵan óz bilimin jetildirýine kómektesetin bolamyz. Atalǵan baǵdarlamany meńgerý kýrsy 120 saǵattan turady. Jáne ony oflaın nemese onlaın túrde ótkizý qarastyrylyp otyr, ol eldegi karantındik ahýalǵa baılanysty bolady», - dedi rektor.
