Saılanǵan aýyl ákimderine qoıylatyn talap ta, jaýapkershilik te joǵary - Abaıbek Júnisov
Onyń aıtýynsha, jergilikti turǵyndar úshin aýyl ákiminiń ózderine jaqyn adam bolǵany óte mańyzdy.
Sebebi eldi mekenniń tynys-tirshiligin burynnan biletin adamnyń basshy bolýy jumysty jandandyratyny sózsiz.
«Memleket basshysy Qasym-Jomart Toqaev aýyl ákimderin saılaýdyń mańyzdy ekenin atap ótken bolatyn. «Osy oqıǵany elimizdiń tarıhyndaǵy aıtýly beles dep aıtýǵa bolady. Negizi, bul – biz úshin strategııalyq máni aıryqsha mindet. Azamattarymyz tuńǵysh ret jergilikti atqarýshy bıliktiń basshysyn tikeleı saılaý múmkindigine ıe bolmaq. Biz buǵan birtindep, josparly túrde keldik» degen edi Prezıdent. Ákimder saılaýy shildeniń sońǵy onkúndiginde ótpek. Elde 700-den asa aýyldyq okrýg ákimi, al Syr óńirinde 40 aýyldyq okrýg ákimi tuńǵysh ret halyq saılaǵan ákim retinde táýelsiz el tarıhynda qalmaq. Degenmen ákim bolý bar, halyqqa jaqyn bolý taǵy bar. Saılanǵannan soń, saılaǵan halyqtyń úmitin aqtap, elge qyzmet etýdiń jóni bólek. Aýyl ákimderine qoıylar talap ta, jaýapkershilik te joǵary», - dedi ol.
Onyń aıtýynsha, aýyl ákimin saılaýdy saıasatkerler birazdan beri usynyp júr. Degenmen halyq úshin ákimdi saılaý eleýli jańalyq bolǵany ras.
«Halqymyz budan burynǵy saılaýlarǵa belsene qatysyp keledi. Sondyqtan qoǵam atalǵan qadamǵa daıyn dep esepteımin. Halyq arasynda qoǵamdyq-saıası zertteý ınstıtýtynyń júrgizgen saýalnamasyna qatysqandardyń 60 paıyzy saılaýǵa barýǵa daıyn ekenin aıtqan. Taǵy bir mańyzdy másele bıýdjetke kelip tireledi. Ár ákim óz aýylyna tıisti bıýdjet bolǵanyn qalaıdy. Aqsha bolmasa, kóptegen másele de sheshilmeıdi. Ár aýyldyń syrtqa kórinbeıtin problemasy bar. Qajettiliktiń kópshiligi aýyldyń óz bıýdjeti arqyly sheshiletin bolsa, memlekettik qyzmette tájirıbesi bar myqty azamattar aýyl ákimi bolýǵa da qyzyǵýshylyq tanytýy bek múmkin. Halyq saılaǵan ákimderge artylar jaýapkershilik te jeńil bolmaıdy. «Ákimder – bıliktiń árbir eldi mekendegi tikeleı ókili. Jurt olardyń qyzmetine qarap búkil memlekettik basqarý júıesiniń tıimdiligin baǵalaıdy. Bıýdjet taqyryby aldaǵy ýaqytta talqylanyp, túıindi máseleler sheshimin tabady degen oıdamyn», - dedi A.Júnisov.
Ol kisi atalǵan saılaý qoǵamǵa jańa lep ákeletinin tilge tıek etti. Tipti saılaý nátıjeli bolyp jatsa, keleshekte aýdan ákimin, oblys ákimin saılaý jumystary da júıelenýi múmkin.
«Buryn-sońdy saılaý júıesinde jınaqtalǵan jumys tájirıbeme súıene otyryp, biz demokratııalyq el bolǵandyqtan, saılaý jumystaryn elimizde damytý qajet dep esepteımin. Halyq únine qulaq asatyn memleket aýyldan bastaý alatyn bolsa, munyń ózi elimizdiń demokratııalyq jolmen odan ári damýy úshin qajet úlken tájirıbe bolmaq», - dedi ol.
Aıta keterligi, Qyzylordada aýyl ákimi saılaýyna 151 kandıdat usynyldy.