Saıajaıǵa shyqqan almatylyqtar kólik keptelisine tap boldy
ALMATY. QazAqparat – Almatylyqtar qala syrtyndaǵy saıajaılaryna kete bastaǵandyqtan kóshede kólik keptelisi bolýda, dep habarlaıdy QazAqparat tilshisi.
Almaty kóshelerinde tirkelgen kólik keptelisiniń beınejazbasy áleýmettik jelide jarııalanýda.
Almaty qalalyq PD baspasóz qyzmeti, búgin megopolıstegi úlken kólik keptelisi bolǵanyn rastady.
«Negizinen kólik keptelisi eki baǵytta baıqaldy. Batysqa qaraı, Jandosova kóshesi men joǵarǵy Qulja trassasynda. Qazir kólik sany azaıdy. Jol ashyldy. Aıta ketetin jáıt. Jolaýshylary bar bir kólikti tekserýge belgili bir ýaqyt ketedi «, – dep túsindirdi polıtsııadaǵylar.
Eske salaıyq, uzaq karantınnen keıin almatylyqtarǵa qala syrtyndaǵy saıajaılaryna barýǵa rusat etildi.
Sondaı-aq, qala ákiminiń birinishi orynbasary Erlan Qojaǵapanov almatylyqtardy sanıtarlyq talaptardy saqtaýǵa shaqyrdy.
«Eń aldymen saıajaıǵa baratyn adamnyń qolynda menshigin rastaıtyn zańdy qujaty bolýy kerek. Sodan keıin ol jaqqa ózin qosqanda úsh adam ǵana bara alady. Mindetti túrde medıtsınalyq maska taǵyp, qolynda antıseptık bolýy shart. Sondaı-aq, asa qajettilik bolmasa saıajaı aýmaǵynan shyǵýǵa bolmaıdy. Qonaq shaqyrýǵa tyıym salynady»,– dedi Erlan Qojaǵapanov.
Buǵan deıin, aýlada jáne saıajaıǵa barǵanda qandaı erejelerdi ustaný kerektigin habarlaǵan bolatynbyz.
