10:18, 29 Maýsym 2023 | GMT +6
Saıajaıǵa ketken pavlodarlyq zeınetker birneshe kúnnen keıin óli tabyldy
PAVLODAR. QazAqparat – Pavlodarda 26 maýsymda joǵalyp ketken 83 jastaǵy qarııa óli kúıinde tabyldy, dep habarlaıdy QazAqparat Pavlodarnews.kz-ke silteme jasap.
«Týǵan-týystary men jaqyndarynyń qaıǵysyna ortaqtasyp, kóńil aıtamyz. Saraptama ótkizgennen keıin oqıǵanyń mán-jaıy anyqtalady. Zorlyq-zombylyq belgileri joq. Bálkim, oqys jaǵdaı bolýy, aǵashtan qulap ketýi nemese densaýlyǵy syr berýi múmkin. Naqty sebebin bilmeımiz», – deıdi Vita volonterleri.
Eske salaıyq, 1940 jyly týǵan zeınetkerdiń joǵalyp ketkeni týraly habarlama 26 maýsymda túsken bolatyn.
Qanatbek Jabyqbaev kúnde «Metallýrg» baǵbanshylyǵyna saıajaıǵa baryp júrgen. Alaıda shamamen saǵat keshki altyda telefon qońyraýyna jaýap bermegen soń, týystary alańdaı bastaǵan.
Qarııany izdestirýge VITA eriktileri, polıtsııa qyzmetkerleri, jedel áreket etý jasaǵy, týystary, otbasy, dostary men belsendi turǵyndar jumyldy.
