Saıajaıǵa baratyn almatylyqtar qandaı qaýipsizdik talaptaryn eskerýi tıis

ALMATY. QazAqparat – Almatylyqtarǵa oblys aýmaǵynda ornalasqan saıajaıyna barýǵa ruqsat etildi. Ol úshin ákimdikke eshqandaı qosymsha ótinish berýdiń qajeti joq. Bul týraly Almaty qalasy ákiminiń birinshi orynbasary Erlan Qojaǵapanov brıfıng barysynda málim etti, dep habarlaıdy QazAqparat tilshisi.

Onyń aıtýynsha, qala turǵyndary saıajaıǵa barý úshin arnaıy bekitilgen erejeni saqtaýy tıis.

«Eń aldymen saıajaıǵa baratyn adamnyń qolynda menshigin rastaıtyn zańdy qujaty bolýy kerek. Sodan keıin ol jaqqa ózin qosqanda úsh adam ǵana bara alady. Mindetti túrde medıtsınalyq maska taǵyp, qolynda antıseptık bolýy shart. Sondaı-aq, asa qajettilik bolmasa saıajaı aýmaǵynan shyǵýǵa bolmaıdy. Qonaq shaqyrýǵa tyıym salynady»,– dedi Erlan Qojaǵapanov

Sonymen qatar, ol jasy 65-ten asqan almatylyqtarǵa úıde qalý jóninde keńes berdi.

«Osy erejelerdi ázirleý kezinde biz saıajaıǵa barýǵa ruqsat suraıtyndardyń basym bóligi elektrondy ótinish berýge qınalatyn egde jastaǵy azamattar ekendigin eskerdik. Sondyqtan jedel shtab saıajaıǵa baratyn azamattardyń júrip-turýyn meılinshe jeńildetýge tyrysty. Endi almatylyqtar tek saıajaıynyń bar ekenin rastaıtyn qujat pen jeke kýáligin kórsetse jetkilikti»,– deıdi Almaty ákiminiń birinshi orynbasary.

Sondaı-aq, ol saıajaıdyń maqsatqa sáıkes paıdalanylýy ishinara tekseriletinin eskertti.