Saıajaıdy «turǵyn úı» dep taný qajet pe? - baspasózge sholý
"Egemen Qazaqstan" gazetiniń búgingi sanynda "Máńgilik El máıegi - ǵylym men bilim" atty maqala jarııalandy. Elbasymyzdyń Qazaqstan halqyna arnaǵan bıylǵy dástúrli Joldaýyndaǵy áleýmettik damýdyń 7 strategııalyq qadamdarynyń barlyǵy da óte mańyzdy. Sonyń ishinde, Memleket basshysy zaman úrdisin tolyǵymen paıymdaı kele keleshektiń kilti kemel bilim men sol bilimdi kemeldendiretin uly kúsh ǵylym ekendigine óte úlken mańyz bergen. Osy máseleler jaıynda tarıh ǵylymdarynyń doktory, professor, Memleket tarıhy ınstıtýtynyń bas ǵylymı qyzmetkeri Zada Dúkenbaeva kólemdi materıal arnap otyr.
"Betin árman qylsyn, biraq elimizdiń áldebir óńirinde «tótenshe jaǵdaı» jarııalana qalsa, ony joıýǵa tartylatyn ishki ister organdary qyzmetkerlerine joǵary eńbekaqy tólenip, jeńildikter jasalatyn bolady", - dep jazady "Aıqyn" basylymy "Polıtseılerdiń áleýmettik paketinde ne bar" atty maqalada.
Gazettiń habarlaýynsha, Qasym-Jomart Toqaevtyń tóraǵalyǵymen ótken Joǵarǵy palatanyń keshegi jalpy otyrysynda senatorlar «Qazaqstannyń ishki ister organdary týraly» jańa zańnyń jobasyn qaraı kele, oǵan óz ózgeristerin qosyp, Májiliske qaıtardy. Eger Tómengi palata túzetýlermen kelisse, qujat qol qoıýy úshin Elbasyǵa joldanady.
"El Úkimeti saıajaıdy «baspana» dep tanýdan bas tartyp otyr", - dep habarlaıdy taǵy bir materıalynda respýblıkalyq "Aıqyn" gazeti.
Materıal avtorynyń aıtýynsha, buǵan deıin Májilistiń birqatar depýtattary «dachalardy» da ýaqytsha emes, turaqty turýǵa jaraıtyn úı retinde bekitýge tyrysqan kórinedi.
Osy maqsatta olar Úkimetten kelip túsken turǵyn úı qatynastary zańyna ózgerister usyndy. Zań jobasy boıynsha qurylǵan jumys tobynyń keshegi otyrysynda osy usynys aınalasynda qyzý aıtys-talastar júrdi. Keıbir qalaýlylar, tipti bılikti halyqtyń osy bóligin ashyndyrmaýǵa da shaqyryp baqty.
"Májilis qaraýǵa alǵan «Qazaqstannyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» dep atalatyn zańnyń jobasynda baspananyń ne ekendigine anyqtama beriledi. Onda turǵyn úıge - jeke úı, páter, jataqhanadaǵy bólme jatatyndyǵy naqtylanady. Al Májilis depýtattary Azat Perýashev pen Nurlan Jazylbekov osylar qataryn «sonyń ishinde saıajaılyq, baý-baqshalyq ýchaskelerde (sadovodcheskıı ýchastok) ornalasqan jeke úı» dep tolyqtyrýdy usynady", - delingen "Saıajaıdy "turǵyn úı" dep taný qajet pe" atty maqalada.
"Túrkistan" gazeti qazaqtyń ulttyq sporty - qazaqsha kúres jaıynda, onyń damýy týrasynda oı qozǵaıtyn maqala jarııalap otyr. "Azııa qazaq kúresine qol soqpaq" atty maqalada qazaq sportynyń álemdik arenadaǵy bedelin arttyrý baǵytyndaǵy jumys týraly da tushymdy málimetter keltiriledi.
"Alaıda, buqara arasynda nasıhattalýynyń azdyǵynan ba, álde saıystar qatarynda qazaq kúresiniń kórine bermeıtindiginen be, áıteýir ulttyq sport oıynyna degen qoldaý kemshin sııaqty kórinetin. Biraq ulttyq sportqa janashyr azamattardyń arqasynda qazaq kúresiniń baǵy qaıta janyp keledi. Qazaq barda, qazaq kúresi óle me?! Árıne, joq! Qýanyshtysy sol, búgingi tańda da elimizdiń túkpir-túkpirinde ulttyq qazaq kúresiniń tamyryn úzbeı júrgen balýandar barshylyq eken. Olar bylaıǵy jurtqa asa tanymal bola bermese de, óz jerinde, óz aýylynda «Túıe balýan», «Pil balýan» degen asa mártebeli ataqtyń ıesi! Aıtyńyzshy, osydan eki-úsh jyl buryn Taraz qalasynyń ataqty balýany Beıbit Ystybaevty kim tanıtyn edi?! Shyǵys Qazaqstan oblysyna tanymal Shalqar Jolamanov pen Aıbek Nuǵymarovty she? Qyzylordanyń atyn shyǵaryp júrgen Ulan Rysquldy kim bilgen? Al, qazir bul balýandardy eńbektegen baladan eńkeıgen qarııaǵa deıin biledi. Tipti, Astanada eki márte dúbirletip ótkizgen balýandardyń beldesýine jınalǵan halyqtyń sanynda esep bolmady. Ol ol ma, kógildir ekran aldynda qanshama jankúıer jeti-segiz saǵat boıy tyrp etpesten otyrdy deseńizshi... Mine, qazaq kúresiniń qudirettiliginiń bir kórinisi!", - delingen materıalda.
