Saıajaı ýchaskeleri jekelegen menshik ıeleriniń múddelerine prokýrorlyq yqpal etý sharalaryn qabyldaýǵa quqyqtyq negiz joq - Bas prokýratýra

ASTANA. QazAqparat - Bas prokýratýra Elordanyń birqatar turǵyndarynyń Astana qalasy ákimdigi laýazymdy tulǵalarynyń memleket muqtajy úshin jer ýchaskelerin alyp qoıýǵa baılanysty áreketterine bergen shaǵymdary qaraldy, dep habarlady QR Bas prokýratýrasy.

Sońǵy 4 jylda Astana qalasynda 2000-nan astam jer ýchaskesi alyndy, olardyń shamamen 98%-y menshik ıelerinen satyp alyndy, qalǵan 2%-y solarǵa teń keletin jer ýchaskelerin berý jolymen alyp qoıyldy.

Alynǵan múlikterdiń negizgi úlesin menshik ıeleri kóp jaǵdaıda turaqty turý úshin paıdalanatyn saıajaı ýchaskeleri quraıdy.

Júrgizilgen tekserýler saıajaı ýchaskelerin alyp qoıýdyń zańnama talaptaryna qaıshy kelmeıtinin kórsetti, Astana qalasy ákimdiginiń áreketteri kommertsııalyq maqsattardy qýdalaýmen jáne memlekettik emes múddelerdi qanaǵattandyrýmen ushtaspaǵan (jer ýchaskeleri memlekettik jáne óńirlik baǵdarlamalarmen kózdelgen memlekettik mańyzy bar jol, basqa da obektiler qurylysyn salý úshin alyp qoıylǵan).

Saıajaı ýchaskeleriniń menshik ıeleri usynylǵan ótemaqyny jetkiliksiz dep eseptep, ony 26 mln. teńgege deıin arttyrý nemese 2, 3 bólmeli páterler berý týraly talap qoıǵan.

Alaıda, osy saıajaı ýchaskeleri olarmen 440 myń teńgeden 1,6 mln. teńgege deıingi baǵaǵa satyp alynǵan.

Elorda ákimdigi ótemaqy mólsheri týraly kelisimge qol jetkize almaýyna baılanysty jer ýchaskelerin memleket muqtajy úshin májbúrlep ıelikten shyǵarý týraly talap-aryzdarmen sotqa júgingen.

Zańdy kúshine engen sot sheshimderimen Astana qalasy ákimdiginiń talap-aryzdary qanaǵattandyryldy, saıajaı ýchaskeleriniń menshik ıelerine úsh mıllıon úsh júz myńnan alty mıllıon jeti júz myń teńgege deıin aqshalaı ótemaqy tóleı otyryp, memleket muqtajy jer ýchaskelerin ıelikten shyǵarý júrgizilsin dep qaýly etildi.

Sáıkesinshe sotpen atalǵan azamattardyń ekonomıkalyq múddeleri eskerilgen, sebebi alynǵan saıajaı ýchaskelerine olardyń salǵan qarajattarynan úsh eseden asa ótemaqy tólengen.

Azamattyq isterdi zerdelegen kezde materıaldyq jáne is júrgizýshilik quqyq normalarynyń eleýli buzýshylyqtary anyqtalmady, osyǵan baılanysty saıajaı ýchaskeleriniń jekelegen menshik ıeleriniń múddelerine prokýrorlyq yqpal etý sharalaryn qabyldaý úshin quqyqtyq múmkindik joq.