Saıajaı satyp almaq bolǵan Óskemen turǵyny jarty mln teńgesinen aıyryldy
ÓSKEMEN. QazAqparat – Óskemen qalasynyń turǵyny saıajaı satyp alamyn dep alaıaqtyń arbaýyna ilikti, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, Ertis polıtsııa bólimine 24 jastaǵy jergilikti turǵyn júgingen. Óz sózinde ol saıajaı satatyndyǵyn aıtqan beıtanys bireýge 500 000 teńge bergenin jetkizdi. Jábirlenýshi qarajatty mobıldi qosymsha arqyly abonenttik nómirge joldaǵan. Alaıda sol ýaqyttan beri alaıaq iz-tússiz joǵalyp ketken.
«Jedel-izdestirý sharalaryn júrgizgen krımınaldyq polıtsııa qyzmetkerleri kúdiktini tapty. 32 jastaǵy er adam polıtsııa bólimshesine jetkizilgen», - dep habarlady vedomstvo ókilderi.
Qazirgi ýaqytta atalǵan fakti boıynsha Qazaqstan Respýblıkasy Qylmystyq Kodeksiniń 190-baby 1-bóligine sáıkes sotqa deıingi tergeý amaldary júrgizilýde.
