«Saıat» ortalyǵy týrızm men ulttyq sport túrlerin damytýǵa septesedi - jeke kásipker
ORAL. QazAqparat - «Saıat» etnotýrıstik ortalyǵy týrızm men ulttyq sport túrlerin damytýǵa septesedi. Bul týraly oblystyq máslıhat depýtaty, kásipker Murat Jákibaev málim etti, dep habarlaıdy QazAqparat tilshisi.
Zelenov aýdany Mıchýrın aýyldyq okrýginde «Saıat» etnotýrıstik ortalyǵy ashylyp, oǵan qatysqan oblys ákimi Altaı Kólginov bul jobanyń «Rýhanı jańǵyrý» baǵdarlamasy aıasynda memleket tarapynan kásipkerlerdi qoldaýy nátıjesinde júzege asyrylyp otyrǵanyn jetkizdi.
Murat Orynbaıulynyń aıtýynsha, ortalyqqa kelgender atpen júrýge, serýendeýge úırenedi. Ippoterapııa keshenderinde emdele de alady. Sonymen qatar ulttyq sport qana emes, konkýr, sándik júris, úshsaıys sııaqty olımpıada baǵdarlamasyna engen at sporty túrlerin damytý da kózdelýde.
«Men ózim qalada óskenmen, túlik tóresi - jylqyǵa da jaqynmyn. Sáıgúlik kórse, qany qyzbaıtyn qazaq joq shyǵar. Memleket basshysy jýyrda jasaǵan Joldaýynda kásipkerlerdiń áleýmettik jaýapkershiligin, Qazaqstannyń aldyńǵy qatarly memleketterdiń qataryna qosylýy úshin jumyla eńbek etýimizdiń qajettigin taǵy da atap ótti. Sonyń ishinde biz, kásipkerler, óz úlesterimizdi qosa bilýimiz kerek. Qalada ónerkásip oryndaryn kóbirek ashyp, básekege qabiletti ónim óndirip, dalada egin egip qana qoımaı, bizdi ósirip shyǵarǵan týǵan jerimizge, elimizge qyzmet etýimiz kerek. «Saıat» etnotýrıstik ortalyǵyn ashýymyz da óńir turǵyndary, ásirese, jastar jylqyǵa qumarlyǵyn joımaı, at minip, serýendep, tipti sporttyq jarystarǵa qatysyp, shyńdalsa degen ıgi maqsattan týyndap otyr», dedi QazAqparat tilshisine M.Jákibaev.
«Saıat» etnotýrıstik ortalyǵynda 22 jylqyǵa arnalǵan turaq, 13 oryndyq ashana, týrıster men kelýshilergen arnalǵan jatyn oryn, oqý synyptary men jyl boıy atpen júrý dáristerine arnalǵan oryndar bar. Bolashaqta velotýrızmdi, sý jáne shańǵy sportyn damytý da oılastyrylýda.
Aıta keteıik, Murat Jákibaev - budan buryn da metsenattyq isterimen óńirge tanylǵan kásipkerlerdiń biri. Sonyń ishinde «Jeńis tarıhy» atty kóp serııaly derekti telefılmder túsirip, qazaqtyń tuńǵysh ushqysh qyzy, Halyq qaharmany Hıýaz Dospanovanyń erligi men ómirin, Ekinshi dúnıejúzilik soǵys kezinde Stalıngrad maıdanyna tıip turǵan Batys Qazaqstan oblysy Bókeı ordasy, Jánibek aýdandaryndaǵy tyl eńbekkerleriniń tynysyn kópke pash etti. Sondaı-aq ataqty konstrýktor Mıhaıl Kalashnıkov týraly «Mataı - ańyzdyń basy», 1801 jyly Bókeı sultannyń patshadan jer alyp, Edil-Jaıyq aralyǵyna kóshýin baıan etken «Eger Bókeı bolmasa...» atty derekti fılmderdi jaryqqa shyǵardy.
