Saıat Medeýov aýylǵa jumys isteýge bardy
TALDYQORǴAN. QazAqparat - Qazaqstan Respýblıkasynyń eńbek sińirgen qaıratkeri, ánshi Saıat Medeýov Saryózek aýylyna jumys isteýge keldi. Búginnen bastap ol Kerbulaq aýdanyndaǵy «Kúreńbel» folklorlyq-etnografııalyq ansambliniń jetekshisi bolyp taǵaıyndaldy, dep habarlaıdy QazAqparat tilshisi.
Kásibı ánshiniń jańa qyzmeti týraly Kerbulaq aýdanynyń ákimi Mahabbat Bıgeldıev Facebook-tegi paraqshasynda súıinshilep jazdy.
Aýdan basshysy: «Búgin Kerbulaq aýdanynyń mádenıet salasynda qýanyshty kún boldy. Qazaqstan Respýblıkasynyń eńbek sińirgen qaıratkeri, belgili sahna sańlaǵy Saıat Medeýov aýdanymyzda qurylǵan «Kúreńbel» folklorlyq-entografııalyq án-bı ansambliniń jetekshisi bolyp taǵaıyndaldy. Saıat Qabylulynyń ónerdegi jáne ómirdegi jınaǵan is-tájirıbesi aýdanymyzdyń ónerpazdarynyń kásibı deńgeıiniń ósýine zor yqpal tıgizedi degen senimdemin! Saıat Qabylulyna iske sát degim keledi», dep jazǵan.
