Saıat Ábildın «Astana Arlans» bas menedjeri mindetin atqarýshy bolyp taǵaıyndaldy
ASTANA. QazAqparat - Búkilálemdik boks serııasyna qatysatyn «Astana arlandary» klýby bas menedjeriniń mindetin atqarýshy bolyp Saıat Ábildın taǵaıyndaldy. Bul týraly klýbtyń resmı saıty habarlaıdy.
Buǵan deıin, 2014 jyldan beri, ol bas menedjerdiń orynbasary qyzmetin atqarǵan.
«Maýsymnyń qyzǵan shaǵynda maǵan qyzmetimnen ketýge týra keldi. Qazirgi ýaqytta komanda 4 naýryz kúni Atyraýda «Qytaı aıdaharlaryna» jáne 18 naýryz kúni Tarazda «Reseı patrıottary» klýbtaryna qarsy ótetin jekpe-jekke daıyndalyp jatyr. Klýb ishindegi bilikti mamandy bul orynǵa qoıǵanyna qýanyshtymyn. Saıatty burynnan bilemin. Aldaǵy ýaqytta jumysyna tabys tileımin», - deıdi Májilis depýtaty Serik Sápıev.
Aıta keteıik, 28 aqpanda Ortalyq saılaý komıssııasynyń otyrysy kezinde «Nur Otan» partııasynyń múshesi Sápıev Serik Jumanǵalıulyn Qazaqstan Respýblıkasy Parlament Májilisiniń depýtaty retinde tirkeý sheshimi qabyldanǵan bolatyn. Sol sebepti ol "Astana arlandary" klýby bas menedjeri qyzmetinen bosatylǵan edi.
